Dei ban ai ka jingïaroh ïaka sorkar MDA 2 ba dang ka lynti kaba jai jai bad ïai shah khatduh ka la lah ban pynkynriah lut ïa ki nongshong madan kiba ju pynkhapngiah ïa ka lynti ïaid ha Pollice Bazar bad mynta shisha la i kyllud ban ïaid ban ïeng ki paidbah. Ka jingïaroh ka dei ban leit sha ka tnad Urban Affair & Municipal bad kumjuh ruh ki bor synshar District bad ki bor pulit kiba la shim khia da ka lynti ba jai jai ban ïakhun bad ki nongdie madan khlem kano kano ka jingïapyni bor bad khatduh khatwai ki nongdie madan ki la kohnguh bad pdiang ban leit shong sha ki jaka ba ka sorkar ka la pynkhreh lypa ïa ki.
Kane ka jingleh jongka sorkar ym dei ba ka knieh ïa ka pliang ja jong ki nongshong madan hynrei ka pynbiang syndon da ki jaka shong ba kin suk bad ïai neh shirta kum ka dukan jongki.Hooid lehse ha kaba sdang ka jingdie jingthied ka lah ban hiar hynrei suki pa suki kan sa kiew hi namar ki briew kiba ju thied jingthied na kito kiba die madan kin sa leit wad hi sha ka jaka ba la buh ba kin shong die. Kane ka jingleh jongka sorkar ka long ym tang ban pynkylluid ïa ka Police Bazar hynrei ban pynkylla dur bad pynitynnad ruh ïa ka Police Bazar ba kan dang khring shuh shuh ïa ki nongwan jngohkai ban wan sha kane ka sor Shillong. Hooid lada ïa nujor ïa kane ka nongbah bad kiwei kiwei ki nongbah ka dei ka nongbah kaba rit tam kaba lah ban ong ba ha kiwei kiwei ki sor bah, i dang dei tang shi bynta jong kata ka sor bah hynrei ka dei pat ka jaka kaba khring bha pat ïa ki nongwan jngohkai namar ka dei ka nongbah kaba i tynnad kaba la ker sawdong da ki lum ki dieng ki siej bad ki wah.
Kane ka jingleh jongka sorkar kam mut ba kan kut tang ha Police Bazar hynrei kan long ha kiwei kiwei ki bynta jongka nongbah kata naduh ka thaiñ Laitumkhrah, Motphran, GS Road bad kiwei kiwei ki bynta jongka nongbah Shillong. Namar ïa kine kiba naduh Motphran ter ter shaduh Stand Jeep, G.S Road ka sorkar ka thmu ban pynkynriah ha kata ka jaka kaba yn sa tei hadien ba la pynkynriah ïa ki Kharmetor na them ïew Mawlong sha ka jaka ba la pynkhreh da ka sorkar. Na ka liang ka ïing bishar mynta ka la ieh ha ka sorkar ba kan ïa pynbeit bad ki nongïalam ka Harijan Panchayat Committee khnang ban ïoh pynkynriah noh ïaki sha ka jaka ba ka sorkar ka lapynkhreh ïa ki. Kane ka long sa kawei ka jingthmu ban pynkylluid ïa ka Them Iew Mawlong kaba la kylla long kum ka jaka ba jakhlia tam ne ka slum area. Kane ka kam ka shim por haduh mynta dei namar ba ki nongïalam jong ki Harijan Panchayat Committee ki kiew ïing lieh ïingsaw namar ba ka sorkar kam shym la mynjur ban ai kat kum ka jingkwah ne jingdawa jongki na ka sorkar.
Ka sorkar ka dei ban pynsted noh ïa kane ka kam ba sahteng khnang ba kane kan long sa kawei ka jingjop jongka jingtreikam jongka. Namar tang shu dep ïakren sa shisien bad ki nongïalam ka Harijan Panchayat Committee (HPC) la sngewthuh ba ka sorkar kan ym ïai ap shuh hynrei kan leh beit ïa kaba donkam katkum ki kyndon ka aiñ. Ka jinglah ban pynkynriah ïa ki kan long ka jingkylluid kaba khraw ka ïaid ka ïeng namar kumba long mynta kawei na ki daw ba jur palat ka jingdheng kali ha ka nongbah Shillong ha ka por janmiet ka dei namar ba ki kali kim ïoh ban ïaid mynmiet na katei ka Sweeper Lane namar ka sorkar ka dang pyrkhat ïoh don mano re mano ban shim kabu ha ka jingdum ka miet tang ban thut ka shongsuk shongsaiñ ha kane ka nongbah. Hooid kiba bun ki paidbah ki kynnoh ba ka sorkar ka shim khia bha na ka bynta jongki hynrei kam long kumta ka sorkar ka pyrkhat jngai bad peit ba ka nongbah Shillong kan long kaba shongsuk shongsaiñ.
Sa shisien dei ban ai khublei ïa ka sorkar MDA kaba la leh ïakiba bun ki kam wat hapdeng ki jingshah beiñ shah kynnoh kiba harukom hynrei katba dang shah beiñ shah kynnoh katta ka dang duriap jur ban trei na ka bynta ka bha ka miat jongki paid nongshong shnong ka jylla. Ka sorkar ka dei ruh ban dang leh sted ïa kine ki jingpynkynriah ïa ki nongdie madan ha kiwei kiwei kijaka khnang ba ki paidbah kin ïoh ban ïaid ban ïeng da kaba suk na ki lynti ïaid kjat ba la shna kyrpang na ka bynta jongki ym ban ïa tynruh lang na surok ba ïaid ki kali.
