Da ka kyrteng u Limison D Sangma phah ka NPP na bynta ka shuki Deputy Speaker

Shillong, Nailur 10 : Ka National People’s Party ka la tyrwa da ka kyrteng jong u MLA ka NPP na Raksamgre constituency u Limison D Sangma na ka bynta ka shuki Deputy Speaker kaba la shong thylli noh hadien ka jingresain u Deputy Speaker ba rim u Timothy D Shira ha kine ki khyndiat sngi.
Ïa ka kyrteng jong u Limison la tyrwa da ki MLA jong ka party ba kynthup ïa u Marcuise N Marak bad u AT Mondal kiba dei ruh ki Myntri Sorkar ka jylla.
Na ka liang u Lamphang ka Iing Dorbar haba kren bad ki lad pathai khubor u la ïathuh ba tad haduh ban da kut ka por thep kyrteng ki ïoh pdiang tang ka kyrteng u Limison kaba mut ba une u MLA u la jop suk ban shimti ïa katei ka shuki.
Hadien kane haba ïa kren bad u Myntri Rangbah ka Jylla, Conrad K Sangma u la pyntikna ba u Limison D Sangma u dei u kyrtong monlang na ka bynta ban shimti ïa ka shuki Deputy Speaker jong ka Ïing Dorbar Thawain ka jylla.
Haba kren bad ki lad pathai khubor u Myntri Rangbah u la ïathuh ba ïa kane ka rai la shim hadien ka jingïasyllok jong baroh ki nongïalam kiba la mynjur ba u Limison u la dei hok ban bat ïa katei ka shuki namar u dei u nongmihkhmat ba la rangbah bad uba la don jingtbit ruh ha ka kam.