Shillong, Jylliew 02: Ka Sorkar Jylla ka la thung ia u Nongaiktien ka BJP bad MLA barim ka Mawsynram Bah Himalaya M Shangpliang kum u Nongaibuit ka Tnad Pule Puthi jong ka sorkar Jylla.
Ia kane la pyntip da u Commissioner & Secretary ba khmih ia ka Tnad Pule Puthi Pravin Bakshi ha ka jingpynbna ba la pynmih hynne ka sngi Thohdieng.
“U Lat ka Jylla u sngewbha ban thung ia u Bah Himalaya M Shangpliang, MLA barim kum u nongaibuit ka Sorkar Meghalaya, ha ka Tnad Pule Puthi ha ryngkat ki jingsiew bad jingmyntoi kat kum ka kyrdan Category “A” ong ka jingpynbna.
Kumban shu pynkynmaw, u Bah HM Shangpliang u la bat ia bun ki tnad sorkar kum u ophisar rangbah (IAS) ha shwa ba un iakhun ia ka elekshon MLA ha u 2018 bad jop ruh ha katei ka samoi na Mawsynram constituency.
