Da ka kyndon 25 (a) ka NDPS Act yn ngat ki trai ïing kiba aiwai ïa kiba khaïi drok

Shillong Risaw 02: Ki trai ïing kiba aiwai ïing ïa kiba dih ne kiba khaïi drok kin ngat ha ka kyndon (section) 25 (a) jong ka NDPS Act bad ki nongbylla poiwir kiba wan bylla sha kane ka jylla kin hap ban wanrah lang bad ka police verification na ki jaka ba ki wan hynrei ngin ngat hapoh ki kyndon jong ka Foreigners Act, ong u MLA ka BJP ka South Shillong Constituency u Bah Sanbor Shullai haba kren sha ki lad pathai khubor ha ka prokram pynsngewthuh paidbah haba ïadei bad ka jingjyllei kiba dih drok, ki nongkhaïi drok, ka jingbun ki poiwir ha ka shnong Jhalupara.
U la ong ruh ba ka jingshah kem jong ka Aisha Khatoon ba ju khot sin ka Pahari na Paltan Bazar ha ki Pulit ka Jylla kaba dang hap hapoh ka South Shillong Constituency ka la pynpaw ba ha kane ka shnong ki don bun jait kum kine ki kam sniew.
U la ong ruh ba ka jingbun ki nongdih bad nongkhaïi drok ha kane ka shnong ka long na ka daw ka jingkhap ngiah ka jaka bad ka jingtad ka bai wai ïing, kaba pynlong ïa ki briew kiba nabar ban wan buhai shnong ha kane ka jaka.
Ha kaba ïadei bad ka jingshah kem kawei na ki nongkhaïi mynta ha ka sien kaba san kaba dei na ka shnong Jhalupara, u MLA u la ong ba kane ka la pynbud nam ïa ka shnong bad kumjuh ruh wat hadien ba ka la shah kem u la ngeit skhem beit ba ki dang don kiwei pat kiba dang pyntyllun ïa ki kam jong ka.
Ka mat ba la ïakren ha kane ka jingïalang kaba la long ha Jhalupara Community Hall ka long ban wanrah ha ka jingtip ïa ki nongshong wai ha baroh kawei ka Shillong Cantonment Board, bad kino kino ki bym shong bymsah bad ki bym dei ki nongshong shnong ba shisha jong ka jylla kidei ban don ïa baroh ki kot ki sla kiba donkam kynthup ïa ka jingpynshisha na ki pulit na ka jylla ba ki wan lem kumta ym shah ïa ki ban sah ha kitei ki shnong namar katei ka kam kaba ïadei bad ka jingwan buhai shnong be-aiñ ka buh ha ka jingma kaba khraw ïa ka imlang sahlang kynthup ïa ka ri.
U la ong, “U Myntri Kam Pohïing jong ka Sorkar Pdeng u Amit Shah ula dep pynpaw ba dei ban leh da kaba tyngeh pyrshah ïa ki nongkhaïi drok bad ki mynder ri be-aiñ. Halor katei ka bynta kino kino ki nongshim wai ha ka thaiñ Paltan Bazar ki dei ban ïoh ïa ka jingpyntip ïa katei bad lada jia ba kim lah ban kohnguh, dei ban leh da kaba tyngeh ïa ki. Kito ki trai kiba ai jaka rieh tngen ïa kum kine ki riewsniew ruh dei ban pynngat lang katkum ki kyndon aiñ.”