Da ka ktem pulit ha Khonjoy, Maheskhola bad Rongdangngai, kyrpad ka Ranikor NPP na u DyCM

Shillong, Nailar 18 : Ka National People’s Party na Ranikor Block ka la kyntu ïa ka sorkar jylla ba kan buh noh da ka ktem pulit ha Khonjoy bad Maheskhola bad kumjuh da ka anti-dacoity (AD) camp ha Rangdongngai hadien ba ka la don ka jingwan pyntriem ki runar na Bangladesh dang shen ha katei ka thain kaba hap ha Ranikor Civil Sub-Division, South West Khasi Hills.
Ha ka dorkhas sha u Symbud Myntri Rangbah ka Jylla, Bah Prestone Tynsong na ka liang u Block President Bah Nelbi T Sangma u la ïathuh ba hadien ka jingwan jurip ïa kitei ki jaka bad ruh ha ka jingïasyllok bda ki nongïalam shnong, ki kynhun bad ki seng bapher bapher ki la sngewdei ba na ka liang ka party kan kyntu ïa ka sorkar jylla ba kan buh noh da ka ktem pahara mardor ha katei ka thain khnang ban wanrah ïa ka jingsngewshngaiñ ïa ki paidbah nongshong shnong.
Shuh shuh u ong ruh ba na ka liang ka Block ka la kyrpad ïa u Symbud Myntri Rangbah ban buh da ka police outpost ha Khonjoy bad ha ki thain Maheskhola nalor ka AD Camp ha ka shnong Rangdongngai da ka jingkyrmen ba kine kin ïarap ban wallam biang ïa ka jingshong shngaiñ ha ka thain kaba la pynrah mynsiem na ka jingwan pyndik ki runar na Bangladesh dang shen.
U Block President u la ong ruh ba na ka liang ki paidbah ki la pyntip ba kim ju nang ïoh thiah bha shuh mynmiet namar ki hap ban ap pali man ka miet.
Shuh shuh u ong ruh ba namar ka jinglong jingman ha ka thain kumta ki la kyntu jur ïa ka sorkar ba kan tuklar mardor.
Ha kajuh ka por, u ong ruh ba na ka liang ka party ka la kyntu ruh ïa u Symbud Myntri Rangbah ba un wan hiar ban jurip ïa katei ka thain lane ban phah da uno uno u Myntri lane MLA na ka jaidbynriew Garo ban sngewthuh ïa ka jingeh ba ki paidbah ki kynduh.