Da ka ‘komiti wad jingshisha’ pynbna u Myntri ban wad ia ka tynrai jong ka formalin ha ki dohkha

Shillong, Jylliew 14 : U Myntri ka tnad Fisheries ka sorkar jylla, Bah AL Hek ha ka sngi Balang u la pynbna ba ka tnad ka la rai ban thaw da ka ‘komiti wad jingshisha’ ban lap lut ïa ka tynrai jong ka jingkynnoh ba ka don ka jingpynpoi ïa ki dohkha ba la khleh formalin na shabar ka jylla.
Ïa katei ka rai la shim hadien ka jingïalang hapdeng ka tnad Fisheries bad ka kynhun jong ki nongsuplai bad nongdie dohkha hynne ka sngi.
Haba kren bad ki lad pathai khubor, u Myntri u la ïathuh ba kitei ki kynhun ki la pyni ïa ka ‘Inspection Report’ jong ka Rask Force Team jong ka sorkar Andhra Pradesh kaba la pynbna ba kam shym la don satia ka formalin/ammonia lane kino kino ki dawai ba la khang ban khleh ha ki dohkha ha kano kano ka rukom shwa ban pynpoi ïa ki sha ki jaka iew.
Na ka liang ka tnad Food and Safety jong ka jylla dang shen ka la khang ïa ka jingdie ïa ki dohkha kiba wan na shabar jylla na bynta 15 sngi hadien ba 32 na ki 40 tylli ki nuksa dohkha la lap ba ki don ïa ka formalin.
“Na kata ka daw, ngi la rai ban thaw ïa ka komiti wad jingshisha ban lap ïa ka daw tynrai. Nga la ong ruh ïa u Secretary ka tnad ba ngi dei ban ïoh ïa ka kaiphod hapoh shisngi arsngi,” bynrap biang u Myntri.
Shuh shuh u ong ruh ba katei ka jingkhang die dohkha kam dei ban neh slem namar kane hi kan ktah ïa ka kamai kajih jong kito kiba im ja na kaba die dohkha.
“Nga sngew ba ngi dei ban don ïa ki jaka ba pynhap ïa ki song thep dohkha kiba wan na kylleng ki bynta jong ka ri ha kaba ki lah ban peit ïa baroh ki dohkha,” u la ong.
Haba jubab halor ka jingkylli, u Myntri ula ong ruh, “Kano kano lada ka long beaiñ, ngin hap pynshitom. Ka sorkar kan sa shim ïa ka rai halor kane ka bynta.”
Nalorkata haba kren pat halor ka jingseisoh jong ka mission ri dohkha, u Myntri u la ong ba ka jingpynmih dohkha ha ka jylla ka la kiew na ka 32persen sha ka 50 persen.
“Ngi kwah ba katba lah ba ki paidbah ki dei ban sdang ïa ka kamai kajih na ka kam ri dohkha. Ki don bun ki jaka ha nongkyndong kumta kane kan ïarap ruh ïa ka jingphet wad bylla na ki nongkyndong sha sor bad kan pyntikna ruh ïa ka kamai kajih kaba neh,” u la bynrap biang.