Shillong, Risaw 21: Ka Mawtawar ka la shu ïoh khur ei ia ki lai point ha ka jingïakhun kaba mar ïa biang bor bha pyrshah ïa ka Nongkrem ha ka jingïakhun jong ka First Division 2025 jong ka Shillong Sports Association kaba long ha ka sngi Ba-ar ha madan SSA Stadium, First Ground, Polo.
Haba phai sha ka kylla step dei ka Mawtawar kaba ïoh ban pynkhih jar nyngkong eh lyngba u Fredrick Lyngdoh tang ha ka minit kaba 7 jong ka kylla step bad pynbud sa u Khrawkupar Nongbri ha ka minit kaba 26.
Mar ïa ïoh lamkhmat 2-0 kol ïa ka Nongkrem shipor ka jingïakhun i kumba ka la sdang pjah hynrei dei ha ka por kaba ym poi pyrkhat ki rangïalehkai ka Nongkrem ki la sdang ban ñion tyngeh bad kane ka la plie lad ïa ka kynhun ban pynphai bad pynïakhaid ïa ka jingïalehkai lyngba ka kol kaba wan na u Robertstar Malngiang ha ka minit kaba 45’+1 bad na u Balajied Lyngwa ha ka minit kaba 46.
Ka jingïoh jong ka Nongkrem ban pynïakhaid mar 2-2 kol tang hapdeng khyndiat minit kaba la pynshongshit puk ïa ka jingïakhun ha ka kylla miet.
La ïohi ruh ba ki rangïalehkai ka Mawtawar ki la pyrshang ban ïakhun tyngeh biang bad kane ka la pynlong ïa ka kynhun ban ïoh lamkhmat biang ha ka minit kaba 51 lyngba u Nikrak Sangma ban pynlong artad ïa ka kynhun ban tam da 3-2 kol.
Pynban dei hadien ka jingïakhun kaba la neh kumba shiteng kynta duna ba ka Nongkrem sa shisien biang kyndit kyndit ka la ïoh ban pynphai biang ban pynïakhaid da mar 3-3 kol ïa ka jingïakhunl yngba u Balajied ha ka minit kaba 80.
Mar ïa lah ban pynïakhaid ïa ka jingïakhun baroh arliang ki la pyrshang tyngeh sa da kumno ban ïoh ïa u namtam ne ban khur ïa ki lai point khlem da hun ia ka shi point ban ïa sam.
Da kane ka rukom ïalehkai, ka Mawtawar ka la ïoh ïa katei ka kabu ksiar lyngba u Alijah Kharumlong uba la ïoh ban thep ïa ka kol kaba kongsan tam ha ka minit kaba 90+1 kaba dei artad shwa ban kut artad ka por ïalehkai.
