Jowai, Nailur 15: Kum ka dak ban pynshlur ïa ki samla pule ba kin pynleit jingmut ha ki jingpule ba kham shalor, mynta ka sngi ka Akhil Bharatiya Vidyarthi Parishad (ABVP) Jowai kala pynlong ïa ka prokram pynkup burom ïa ki samla pule ka Ri-Lum Jaiñtia da ka khusnam “U Kiang Nangbah Best Student Award-2022’.
Ïa kane ka prokram la pynlong ha Marian Hills Higher Secondary School Vianney Hall Jowai, ha kaba ka Kong Trinity Saioo kaba la ïoh ïa ka khusnam ‘Padma Shri Award’ ka la long kum ka kongsan, ha ka jingdonlang u ma S.K. Lato, u Dolloi ka Elaka Jowai ma Puramon Kynjing, u Dr. Phervision Nongtdu Principal ka Jaiñtia Eastern College, ma Khroo L Pariat, kong Darilin Tang, ka Nibiang Sumer State Secretary ABVP, ki kmie ki kpa jong ki samla pule nalor kiwei de kiba la shah khot sngewbha.
La ïathuh da ka Nibiang Sumer ba kane ka dei ka sien ba san (5) ba ka Akhil Bharatiya Vidyarthi Parishad (ABVP) Jowai kala pynlong ïa ka jingsam khusnam sha ki samla pule jong ka Ri-Lum Jaiñtia bad mynta ka sngi kila ïoh ban sam ïa kane ka khusnam sha ki 56 ngut ki samla pule napdeng ki 37 tylli ki skul hapoh ka East bad West Jaiñtia kiba la wan shakmat ha ki exam jong ka Class-X bad Class-XII bad kiba la ïoh ruh ïa ka Highest Mark ha ki subjer bapher bapher.
Na ka liang ka ABVP Jowai ka kitbok kitrwaing ïa kine ki 56 ngut ki samla pule ba kin dang ïai kiew shaphrang ha ki jingpule ba khah shalor ban long ki lawei ba phyrnai jong ka ri bad ka Jaitbynriew, shuh shuh kane ka jingsam khusnam kan dang ai mynsiem ïa kitei ki samla pule ha ka lawei ba phyrnai jong ki.
