Da ka khusnam pynkup burom ka KSU Barak Valley Circle ïa ki samla khasi kiba pass bha

Khliehriat risaw 30: Ka Khasi Students Union Barak Valley Circle, myn ha ka 28 tarik mynta u bnai risaw ka la pynlong ïa ka prokram sam khusnam sha ki 45 ngut ki samla pule kiba pass bha bad kumjuh la pynlong ïa ka jingpdiang burom ïa ki samla khasi kiba sah ha sor Silchar Assam.
Ha katei ka sngi la ia don ryngkat lang ruh u President rangbah jong ka KSU, u samla Lambok-starwell Marngar kum u kongsan.
Kum u kongsan, u la ai la jing kitbok kitrwiang ïa ka KSU Barak Valley circle ba kan nang lah ban pyntyllun ïa ki kam ki jam ba man la ka sngi, u kyntu ruh ba ki dei ban long rangbah ha ka pyrkhat pyrdaiñ bad ai mynsiem ruh ba ka circle kan lah ban trei bha ban peit ïa ki jingeh ba ki para doh para snam kiba ki iakynduh na ka sngi sha ka sngi
Haba kren sha ki samla pule kiba ioh ïa ki khusnam, u tei u nongialam ka KSU , u la ai mynsiem shuh shuh ba kin nang ïaid sha khmat ha ki jingpule jong ki bad ba ym dei ruh ban kyrkieh ïa ka shongkha shong man “kum ka jaitbynriew ngi dei ban snewthuh bha ïa ka dor jong ka jingnang jingstad, ka KSU ka iaid don ryngkat, kan ai ïa ka kti ka mon kti ka diang, phi dei ban long kum ki sharak ban tbeh jingshai bad long ruh kum ka stieh ban ïada ïa ki para doh para snam mynta bad pateng la pateng, nga ngeit ba ba ki para doh para snam kin nang ïai kiew bad kin nang ïai beh bad sei ruh ki soh kiba kynsai kiba lah ban pyni ba kum ka jaitbynriew ngi khlaiñ ha ka bor pyrkhat bad da ka jingstad bad jingshemphang ngin nang ïaid shakhmat” la bynrap. ,
U kyntu ïa ki samla pule ba ki dei ban buh ïa ka thong bad ruh ban poi sha ka thong ban ïada ïa ki para doh para snam kiba don ha ka thaiñ Silchar hi baroh kawei bad ruh ban peit nuka ïa kiwei pat kumno ki lah ban iakhun ha ki kyrdan bapher bapher “ka por jong phi ka dang bun byllai ban ai ïa ka bha tam ïa ka ri bad ka jaitbynriew te to leh ïa kaba bha tam wat kynran dien, wat ym tieng namar ka don ka jing ong ba u khawpud u iap bunsien katba u riew shlur u iap tang shisien”
Haba kren kyllum lang ïa baroh kum ka jaitbynriew u la ong “ngi don ka jingkyrnem ba kan don ka jingiatylli nangne shakhmat, ym dei shuh ban ailad ïa ka rukom pyrkhat kaba mynshwa kaba ong Divide and Rule Policy, hynrei ngi dei ban iateh song lang kawei.
Kiba la ïa don ryngkat lang ha katei ka sngi ki kynthup ruh u Assistant Education Secretary KSU CEC, u samla Shalkitbok Kharbnai, ki dkhot ka KSU u samla Rueben Najiar, u Richest Malngiang ,Samla Pynshai Kupar Dkhar, Alerick Kharjana lem bad ki dkhot jong ka KSU East Jaiñtia Hills District Unit, ki dkhot ka KSU Vairangte Unit, u bah Sebastian Pakyntieñ, u ba dei u Chairman jong ka Khasi Jaiñtia Village Development Council, u bah Charles Rymbai President ka Barak Valley Khasi Jaiñtia Welfare Organisation, u bah Wanbor Pdang General Secretary ka Barak valley Khasi Jaiñtia Welfare Organisation bad kiwei kiwei.
Lah pynphuh pynphieng ïa ka prokram da ki jingshad tynrai na ki samla ka thaiñ.