Shillong, Nailar 17: Ki pulit ka Assam ha ka sngi Saitjaiñ ki la pynbna ba kin ai khusnam da ka song pisa kaba T.5 Lak ïa kiba ai ïa ki jingtip kiba paka ha kaba ïadei bad ka jingtohkit ka jongki halor ka jingbuh bomb da ka ULFA-I.
Ka khubor ka ïathuh ba ki pulit ki la sdang pynlong ïa ka jingwad ha kylleng ki jaka, hadien ba ka kynhun kieng atiar ka la byrngem lyngba ka kyrwoh khubor ba kala dep ban buh ïa ki bomb ha ki katto katne ki jaka kiba don hapoh ka jylla.
“Ngi kyrpad ïa ki paidbah ba kin ai ïa ki jingtip ha kaba ïadei bad katei ka jingtohkit ïa ki kynja bomb kiba la buh da ka ULFA. Ki jingtip kiba paka ha kaba ïadei bad ki briew kiba donkti ha kaban shna, ban pynkit bad ban buh ïa kitei ki tiar pynbthei,” la pynpaw ki pulit ka Assam.
Nalor kane, kila pynpaw ruh da kaba ong, “Ba ïa ki briew kiba ai ïa ki jingtip yn ym pyntip briew ïano ïano ruh shaphang ka jongki”.
Haba ïakren bad ki nongthoh khubor, u Police Commissioner ka Guwahati u Diganta Borah ula pynthikna ba la ïoh kurup ïa ki tiar ki tar kiba ïasyriem bad ki IED ha artylli ki jaka hapoh ka nongbah.
“Ngi lah lap ïa ki circuit, ki tiar pynbthei bad kiwei kiwei ki bynta, hynrei kiwei pat ki lad pynbthei kiba kongsan kim shym la don,” ula ong.
U Borah ula ong, “Ngi lah ïohpdiang ïa ki jingtip kiba paka na ka tnad syntiat halor ki 8 tylli ki jaka kiba don hapoh ka nongbah. Ka kynhun ka jong ngi ka la pynlong ïa ka jingwad bniah kaba jur ha baroh kitei ki 8 tylli ki jaka bad kila dep ban pynlong ïa ka jingwad bniah ha ki 6 tylli ki jaka bad na ki ar tylli ki jaka kiba kynthup ïa ka Panbazar bad Gandhi Basti la lap ïa ki kynja tiar kiba la suba jur bha”.
Kumba ju long man la ka snem, mynta u snem ruh ka ULFA-I kam shym la treh ban ïashimbynta lang ha ka jingrakhe ïa ka Independence Day.
Ki bor pahara bad ki kynhun jong ka Bomb Squad kila trei ïa la ka kam hadien ba ka la don ka jingbyrngem buh bomb ka ULFA-I ha ki katto katne ki jaka ka jylla Assam.
