Nongpoh, Nohprah 08 : Da ka jingsarong ki nongïalam ka Hill Farmers Union (HFU) Ri Bhoi District ha ka jingïalam u General Secretary u Bah Pynshai Masharing ha ryngkat ka jingdon lang u President ka Raid Ïapngar Circle u Bah Elbert Ramde lem bad ki dkhot ki la leit ban ai ïa ka jingkitbok kitrwiang ïa uwei na u dkhot uba dei u Bah Monlang Thangkhiew na ka Shnong Madan Lakhiat ha Ri Bhoi u ban sa ioh pdiang ïa ka khusnem kyrpang ba la tip kum ka khusnam, “Farmer of the Year 2025 uba la shah jied na ka jylla Meghalaya ban leit pdiang ïa katei ka khusnam ha Nongbah Delhi.
Kumba la pyntip da ki nongïalam ka Hill Farmer Union Sengkmie, u Bah Monlang Thangkhiew un sa leit pdiang ïa katei ka khusnam haka jingsynran lang u Bah ALffondbirth Kharsyntiew uba dei u General Secretary ka Hill Farmers Union Sengkmie.
Haba leit ban ai ka jingkitkbok kitrwiang ïa une u dkhot u ban ioh pdiang ïa katei ka khusnam Farmer of the year 2025 ha ka ïingsah jong u ha Madan Lakhiat ha Ri Bhoi, u Bah Pynshai Masharing kum u General Secretary ka HFU Ri Bhoi, u la pynpaw ïa ka mynsiem jong ka jingsarong kaba khraw ba u Bah Monlang Thangkhiew kum u dkhot ka seng un sa ioh pdiang ïa katei ka khusnam kaba long ka burom ïa ki nongrep bad ïa ki paidbah ka jylla.
U la ong ruh ba ka seng ka sngewkmen ruh ba u Bah Monlang Thangkhiew u dei uwei na u nongrep uba ju leit ban ai jinghikai ïa ki nongrep ha kylleng ka them Ri Bhoi bad u dei ruh u rangbah uba la pyntbit bha ïa lade ha ka kam ri sniang bad dei lyngba ka jingtrei shitom bad ka jinglen lade ba u don hok ruh ban ioh pdiang ïa katei ka khusnam ha Nongbah Delhi.
Shuh shuh, u la bynrap ruh ba ka seng ka pynpaw ïa ka mynsiem jong ka jingkmen ïa une u rangbah uba dei shisha u rangbah uba pynlut ïaka por ha ki kam rep ki kam riang bad kane ka jingioh pdiang jong u ïa katei ka khusnam ka long shisha ka jingaimynsiem ïa ki nongrep ha Ri Bhoi bad ha ka jylla hi baroh kawei, u labynrap.
Kum ban pyntip sha ki paidbah, u Bah Monlang Thangkhiew un sa ioh pdiang ïa katei ka khusnam Farmer of the year 2025, ka dei ka jingshah jied lyngba ka Krishri Jagran, kaba dei ruh lyngba ka jingïatrei lang ka ICAR bad ka KVK, Umiam.
