Tura, Nailur 25: U Mahasankar Majumdar uba dei u scientist jong ka Muga Eri Silkworm Seed Organisation (MESSO) ha ka Central Silk Board’s P4 Seed Station ha Mendipathar, North Garo Hills District jong ka Meghalaya, ula ïoh ïaka khusnam Best Scientist Awards.
U Majumdar ula ïoh ïa ka jingithuh halor ka jingnoh synniang kaba radbah jongu sha ka Muga Seed Sector naduh u snem 2019 haduh u 2023.
Ka Central Silk Board (CSB), kaba hap hapoh ka Ministry of Textiles, jong ka Sorkar India, kala ai jingithuh ïa ki 15 ngut ki Scientist ha ki lai tylli ki bynta halor ka jingnoh synniang ba kyrpang ka jongki ha kaba ïadei bad ka kam Sericulture. Kila ïoh pdiang ïa ka ‘Best Scientist Awards’ kum shi bynta jong ka jingrakhe ïa ka “National Silk Day” bad kum ka jingrakhe ïa ka Platinum Jubilee jong ka Board ha ka 20 tarik Nailur 2024, ha ka jingïalang kaba la long ha Mysore, Karnataka.
ïa kitei ki khusnam la ai sha ki Scientist ha ki bynta bapher bapher jong ka jingwad bniah, jingpynroi, jingpynïar bad ha kaba ïadei bad ki bynta jongki symbai.
U Majumdar ula ïoh pdiang ïa katei ka khusnam ha ka jingdon lang u myntri ka sorkar pdeng uba khmih ïa ka tnad Textiles u Giriraj Singh, u myntri khynnah ka sorkar pdeng u Pabitra Margherita bad kiwei kiwei ki heh ki haiñ ha ka jingïalang kaba la long ha Karnataka State Open University Convocation Hall ha Mysore.
U Majumdar ryngkat bad ka kynhun jongu, kila trei shitom ha kine ki 5 snem kiba la dep ban pynmih ïa ki symbai Muga kiba bha tam ha Mendipathar Unit da kaba ïoh palat 100% ka jingjop ha katei ka jingpynmih. Ka P4 Unit mynta ka pynleit jingmut ha kaban pynmih ïa ki symbai Muga ha ki jaka kiba khriat kum ha Kalimpong bad Darjeeling ha West Bengal bad ban kyntiew ïa ka jingpynmih ha ki jylla ka thaiñ shatei lam mihngi, kumba la bthah da ka MESSO, Guwahati.
