Shillong, Naiwieng, 01: Ka Khasi Students Union (KSU) NEHU Unit ha ka sngi Thohdieng ka la pynkup burom ïa ki samla pule na ki Department bapher bapher kiba la pas bha ha ki eksamin ba la pynlong da ka skulbah NEHU ha ka jingïalang kaba shongkun kaba la long ha Multi-Use Hall, NEHU Campus, Shillong kum shi bynta ban nang ai mynsiem shuh shuh ba kin nang bteng ban ïai trei shitom ha ka jingim ka jong ki.
Ki samla pule kiba la shah pynkup burom ha kane ka sngi ki dei kiba la ïoh ïa ki Gold Medalist ha ki sobjek bapher bapher bad ki samla pule kiba la pyndep ïa ka jingpule Ph.D.
Ha kane ka jingïalang la sakhi lang da u Chairman jong ka North East Students Organisation u Bah Samuel B. Jyrwa uba la long kum u kongsan ryngkat ka jingdonlang jong u President ka KSU Seng Kmie u samla Lambokstarwell Marngar kum u Symbud Kongsan, u General Secretary u samla Donald Thabah bad u Prof. Desmond Kharmawphlang kum ki Symbud Kongsan.
Ka KSU NEHU Unit ha kane kajuh ka sngi, ka la pynskhem ruh ïa ki nongkitkam ba thymmai jong ka seng na ka bynta ka samoi treikam jong u snem 2024-2025.
Ha kane ka sngi la pynbam smai ïa ki nongkitkam jong ka KSU NEHU unit da u President ka Seng kmie u samla Lambokstarwell Marngar ha kaba u samla Shibaitlang Rymbai kum u President, Cicilia Pyngrope Vice president, u samla Kevin N Wanrap kum u general secretary, Ibakordor Marwein Assistance General secretary, u samla Reddy Tariang Finance secretary, Mebanbat Kharmawlong Publicity Secretary, Tiplut Wann Education Secretary bad 7 ngut ki executive members.
