Nongstoiñ, Nohprah 09: Watla ym pat pynbna haduh lano yn pynlong ïa ka elekshon ban jied ïa ki nongmihkhmat sha ka Khasi Hills Autonomous District Council (KHADC) hynrei ki seng saiñ pyrthei ki la sdang ban khohreh ban wad ïa ki kyrtong ki ban mih madan kum ki MDC.
Ha Nongstoiñ constituency ki party kiba ladep don ïa ki kyrtong ki long ka National Peoples Party, kaba la dep phah ïa ka kyrteng jong u Bah Dressar Marngar sha ka State Election Committee ba kan mynjur ïa u kum u kyrtong MDC. Nangta ka Voice of the People Party ruh ka la dep pynbna ïa u bah Marbiang Nongsiej kum u kyrtong MDC bad ka HSPDP, ka la rai ban pynïeng da ka kong Badariti Lyngdoh Nonglait ka khun pyrsa trai jong u (L) Maieit Hopingstone Lyngdoh.
Ka party ka la ïakut ban phah ïa ka kyrteng jong ka kong Badariti Lyngdoh Nonglait sha ka State Election Committee jong ka central body, ha ka jingïalang kaba la pynlong ha Upper New Nongstoiñ Lower Primary School ha kane ka sngi saitjaiñ.
Ha ka jingïalang kaba kyrpang kaba la long ha katei ka sngi, wat la ki nongkitkam na ki primary unit kim shym la ïa poi lut, hynrei lajan baroh ki nongkitkam ba kham ha khmat ki la ïapoi ryngkat ruh bad ki nongïalam ba ha khieh duh jong ka party naduh u bah K.P.Pangñiang president rangbah, u bah Panbor Ryntathiang secretary central body, ki nongkitkam ka HSPDP Youth Wing ki dkhot ka Central Executive Committee, ka kong Badariti Lyngdoh Nonglait bad ki bahaïing hasem lem bad kiwei kiwei ki nongkitkam.
La pynïaid ïa ka jingïalang da u bah K.P.Pangñiang bad hadien ka jingïatai sani kaba bniah bha, ka jingïalang ka la sngew dei ba la kumno kumno ka party ka la dei ban pynbna noh ïa ki kyrteng jong ki kyrtong ki ban ïakhun ha ka MDC Election. Namar ka por kam slem shuh hynrei haba pan jingtip ïa ki kyrteng jong kiba applai tiket na ka party na ka Nongstoiñ constituency, don tang kawei kata ka kyrteng jong ka kong Badariti Lyngdoh Nonglait.
Kumta da kawei ka sur ka ïing baroh kawei ka la mynjur lang bad pynskhem ïa ka kong Badariti Lyngdoh Nonglait kum ka kyrtong MDC jong ka HSPDP na ka Nongstoiñ constituency. ïa ka kyrteng jong ka, ka jingïalang ka la ïakut ban sa phah sha ka Central Executive Committee ba kan ai ka jingmynjur bad ban pynbna.
U bah K.P.Pangñiang u la ong ba na ka bynta ka MDC Election ka ban sa long ha u snem ban wan, ïa ka jingjied ïa ki kyrtong ka party ka shaniah beit ha ka jingai jingmut jong ki primary unit bad ïa kaei kaba ki nongkitkam jong ki primary unit ki la sngew dei bad ïahun lang, ka CEC ka shu mynjur beit.
U bah Pangñiang u la ong ba kan ym don shuh ka jingpynkylla halor ka tiket, namar ba ïa ka kyrteng jong ka kong Badariti Lyngdoh Nonglait, la dep mynjur da baroh ki nongkitkam jong ka Nongstoiñ area unit, ha kaba u la pynthikna ruh ba ka party ka CEC kn mynjur beit ïa kaei kaba ki Primary Unit ki la dep rai.
