Shillong, Ïaïong 21: Kum ka jingkynmaw ieid ïa ka lyngkhuh sngi ïap ba shi snem jong u Vice President ka seng, u Bah Kenedy Warlarpih, ka Bouncer Association of Meghalaya (BAM) ha ka sngi Palei ka la pynkup burom ïa ki dkhot jong ka seng kiba la wanrah ïa ka nam bad ka burom sha ka jylla Meghalaya ha ka jingïalang kaba la long ha Shillong Press Club.
Hashwa ka jingpynkup burom, ki nongïalam ka Seng kiba kynthup ïa u Bah Sharai Hujon, u Bah Nicky Songshiang bad u bah Andy Rumnong ki la ïathuh ba ka seng kan sa rakhe ïa kane ka lyngkhuh sngi ïap jong u nongïalam ka seng da kaba pynlong ïa ka Late Kenedy Warlarpih Memorial Trophies naduh ka 2 tarik Jymmang haduh ka 4 tarik Jylliew 2022 kum ka Football, ka Cricket, ka Basket Ball, ka Marathon bad ka jingpynkhuid shnong tang hapoh ka jylli jong ka shnong Malki, Shillong.
Ki san ngut ki dkhot jong ka seng kiba la shah pynkup burom ki long u samla Johnny Nongrum uba la jop ha ka MMA Champion India 100 series 2022, u samla Mordekai Simon Kharpuri uba la ïoh ïa ka khusnam Belt Champion of India 100 Series 2022 bad ka Samla Badalin Kharbyngar, u samla Donbor Rumnong uba la jop ïa ka kyrdan kaba hynñiew ha ka jingïakop Mr. Universe Men physique 2022 bad ka samla Balasuk Makri kaba la jop ïa ka lympung ïakop thei bhabriew jong ka Miss Ribhoi Tourism 2022
Ha ka jingpynkup burom ïa kine ki san ngut, la sakhi lang da ka Kurim jong u Bah Kenedy Warlarpih ka Kong Jeblinda Kharmalki, ka para kynthei ka kong Basuk Warlarpih, u president ka shillong Press Club u Bah David Laitphlang, ki khun jong u Bah Kenedy Warlarpih bad kiwei kiwei kiba la shah khot sngewbha.
