Da ka jingthoh ujor ka HITO sha u EE, PHE bym hun ïa ka jingpyntreikam ïa ka skhim JJM ha Ri Bhoi

Nongpoh, Nailar 12: Ka Seng HITO Raid Myrdon Area ka la mih sha khmat ban ujor syndon da ka jingthoh sha u Executive Engineer ka Tnad PHE Umsning Division halor ka jingbym hun ïa ka rukom pyntreikam u Contractor ïa ka scheme JJM ha ka shnong Nongmawlong bad ka shnong Mawlong Thymmai
Ka seng ha ka jingïalam u President, u Bah Seibor Maring bad u General Secretary, u Bah Moon Maring ki la leit ban ujor da ka jingthoh sha u Executive Engineer ka tnad PHE ha Umsning ka dei ban ujor halor ka jingkynnoh ba ym shym la pyntreikam ïa ka skhim kumba ka dei ban long bad mang da ka sorkar lyngba katei ka skhim JJM kaba wan ka sorkar pdeng.
Ki la leit ban ujor sha u Executive Engineer ka tnad PHE, ka dei ruh hadien ba ka seng ka la wan ban jurip ïa ka jingpyntreikam ïa katei ka skhim bad kynduh ruh ïa ki paidbah nongshong shnong ba kim hun satia ïa ka jingpyntreikam ba u Contractor u khlem pyntreikam kumba mang da ka sorkar.
Ka seng HITO Raid Myrdon ha katei ka shithi ka la pynpaw ka jingsngewkhia halor ka jingkynnoh pyntrei torti ïa katei ka skhim ha kaba la kynnoh ruh ba u Contractor u la pyndonkam da ki pipe um ba la rim bad ka ka Tanky um kaba dei ban shna kumba 7 tylli la shna tang 6 tylli.
Shuh shuh, ha katei ka shithi ba la ujor sha u EE ka tnad PHE, Umsning, ki nongïalam ka Seng HITO Raid Myrdon ki la pynpaw ruh ba ka seng kam hun satia ïa ka jingpyntreikam ïa katei ka skhim ba la trei torti da u Contractor ha kaba haduh mynta ki paidbah ki dang mat ka jingkyrduh um ha kitei ki shnong bad kum ka seng ka kyrpad jur ïa u EE ka PHE Umsning ba un phah tohkit ïa kane ka kam ba lada lap ba katei ka jingpyntreikam ïa ka skhim JJM kam biang satia dei ban leh ei ei ïa u Contractor ba u hap ban pyndep pura ïa katei ka skhim khnang ba kan ai jingmyntoi ïa ki paidbah ban ioh ïa kata ka umbam umdih kaba biang ba pura kumba la mang da ka sorkar pdeng, ki la bynrap.