Shillong, Jymmang 29 : U nongïalam ka VPP ba dei ruh u MLA ka Nongkrem, Bah Ardent Miller Basaïawmoit hynne ka sngi u la phah da ka jingthoh sha ka komiti jong ka Roster System ba um pdiang satia ïa ka rai jong ka sorkar ban kynthup lang ïa u ha ka Committe on Roster System.
Ïa katei ka shithi, la phah sha ka Chairperson jong ka Committee bad Myntri ka sorkar jylla, Kong Ampareen Lyngdoh khyndiat kynta ha shwa ka jingkynduh ba nyngkong jong ka Committee ha kane ka sngi Nyngkong.
Ha katei ka shithi, u Bah Ardent u la ong, “….Nga kyntait ban long u dkhot ha ka komiti jong phi. Ka Voice of the People Party ka ieng beit ha ka nongrim ba donkam ban peit bniah biang ïa ka bhah thungkam thung jam (Reservation Policy) ha shwa kano kano ka jingïatai ha ka roster system. Kumta lada ka Reservation Policy kadei kaba duna nadong shadong, ka jingïatai bad ka jingpyntreikam ïa ka roster kan dei kaba thut.”
Lah ruh ban kdew hangne ba u Bah Ardent u la shah thngan mynta la 7 sngi pura ban pynbor ïa ka sorkar jylla ba kan peit bniah biang ïa ka Reservation Policy.
