Jowai, Naiwieng 25: Ki kynhun sengbhalang kiba kynthup ïa ka JSU, FKJGP, KSU, HNFY bad ka RBYF mynta ka sngi ha ka por 3 baje janmiet kila sdang ïa ka jingïalang ha Lad Kiang Nangbah Govt. College Jowai bad hadien kane kila pynlong da ka jingthang mombati kum ka dak ban pynpaw ka jingsngewlem halor ka jingshah siat ïap ki 5 ngut ki para doh para snam na ka shnong Mukroh West Jaiñtia Hills ha ki pulit Assam haka 22 tarik mynta u bnai.
Kiwei de ki sengbhalang kiba la wan ban ïadonlang ki kynthup ïa ka STIEH, AHPUF nalor kiwei kiwei de bad ha ka juh ka por ki la pynrem jur ïa kane ka jingleh jong ki pulit Assam pyrshah ïa ki Khasi Pnar kiba shong ba shah ha ki jaka khappud.
Kitei ki nongïalam sengbhalang ha ka jingkren kila pynrep jur ïa kane bad la dawa jur na ka sorar ban kan kem noh mardor ïa kiba donkti siat ïap ïa ki 5 ngut bad ban pynshitom ïa ki katkum ki kyndon aiñ, la dawa ruh ïa ka sorkar ba kan pynbeit noh mardor ïa u pud u sam hapdeng ka jylla Assam bad Meghalaya bad ha ka juh ka por la dawa ban buh noh ïa ka Police Out Post ha Mukroh lane ha Mukoilum.
Kiwei de ki riew rangbah kiba ai jingkren ki kynthup ïa u ma Erwin K. Sutnga uba la dawa ba ka sorkar jylla ba kan shimkhia mardor ïa kane ka jingeh kaba ki paidbah ha ki thaiñ khappud ki ïa kynduh na ka por sha ka por la 50 snem mynta.
Ha kaba ïadei bad ki 6 tylli ki jaka ba dang sah ha ka jingpynbeit pud, hynrei kaba sngewsih ba ka shnong Mukroh ka khlem hap satia ha kane ka thup kumno pat kane ka jaka kan hap shapoh ka jylla Assam kine baroh ki dei ki jingleh Copy Paste jong ka sorkar jylla, ong ma Sutnga.
Ula kyntu ba jingïakhih kan dang ïaid shakhmat da ka jingïasnohkti lang jong baroh ki seng bhalang bad ki paidbah, shuh shuh ula pynsngew ba ïa ka mukotduma kaba yn sa ujor sha ka ïing bishar ha kaba ïadei bad kane ka jingpynbeit pud kala don haduh 600 page ha kaba dang ap sha ka jingsoi jong kito ki nongshong shnong kiba don ha khappud.
U ma G. Rymbai u nongkitkam ba rim ka JSU ha ka jingkren ula ai jingmut ïa baroh kiba ïadon bynta lang ha kane ka jingthang mombati hashwa ban jied ïa ki MLA ki ban ïakhun sha ka ïing Dorbar thaw aiñ ka jylla ha kane snem ban wan, kim dei satia ban file Nomination lada kim lad ban pynbeit ïa kane ka jingeh ban pynbeit ïa u pud u sam ba pura.
Kaba sah mynta ka long satang ka sorkar kmie hapoh Parliament jong ka Ri, da kaba kyntu ban ym dei ban ïakhun da ka jingïaumsnam namar kam poi shano shano hynrei dei ban ïaid da ka jingïasngewthuh jingmut da kaba kyntu ïa baroh ban pynsngew ïa kane sha kitei ki bor ba halor jong ka Parliament.
