Da ka jingshah thngan yn pynlong ha Shillong lada ym urlong ka jingdawa

Jowai, Jymmang 09: Ka All Jaiñtia Mid Day Meal Workers Union (CEC) Jaiñtia hills, Jowai, ha ka jingïalang kaba la long mynta ka sngi ha ïing Dorbar ka Ladthalaboh Jowai, kila shim ïa ka rai ban ai por biang ïa ka sorkar jylla kumjuh ïa ka sorkar kmie haduh ka 21 tarik u Jymmang, 2022 na ka bynta ba kin ai jubab halor ka jingkyrpad ban pynkiew ïa ka bainong shet ja sngi hapoh ka PM POSHAN (Mid Day Meal).
Ha kane ka sngi la pynïaid ïa ka jingïalang da ka Vice President kong Biola Ïakai ha ryngkat ka jingdonlang u Ma Khroo L Pariat u nongaibor ai buit ka seng lem bad kiwei de, la pynsngew ba ka seng kala dep ban ai ïa ka jingthoh sha u Narendra Modi u Myntri Rangbah duh ka Ri bad sha u Myntri Rangbah ka jylla lyngba u Governor ka jylla ha ka 01/04/2022.
Kumta na ka liang ka All Jaiñtia Mid Day Meal Workers Union ka la kren shai lada ka sorkar kam lah ban ai jubab hapoh katei ka tarik ba la buh, ka seng kan khot ïa baroh ki nongshetja sngi ka jylla ban pynlong da ka jingshah thngan ha Shillong ha kane hi ka taïew jong u bnai Jymmang 2022.La ïathuh ruh ba ka sorkar haduh mynta kam pat dep siew ïa ka bainong jong ki kaba long 100 tyngka shi bnai na ka sorkar jylla bad 900 tyngka shi bnai na ka sorkar pdeng naduh jong u bnai November 2021 haduh u bnai April 2022.
Ka seng ka pynpaw ïa ka jingsngew bynñiaw ha kawei ka liang ba ka sorkar jylla ka hukum ban shet ja sngi ïa ki khynnah manla ka sngi ha kawei ka liang pat ka sorkar jylla kam siew pat ïa ka bainong kaba la sah saw bnai kaba la dep trei, kila buh jingkylli hato kam long pop ban shim ïa ka pisa bad ka bhah kiba duk ba tlot bad khlem da kheiñ burom shuh ïa ki kynthei ki longkmie.
Ha kane hi ka sngi ka seng ka la leit ïa kynduh ïa ka DSEO ka WJHD hynrei namar ka dei ka sngi Monday kam shem la wan trei, te ka seng ka la ïa kynduh ïa u Bah L.S. Lyngdoh Joint Director DESEL West Jaiñtia Hills District bad la kyrpad ïa u ban ïa kren ïa ka sorkar jylla ban siew noh mar mar ïa ka bainong trei naduh u bnai November 2021 haduh u bnai April 2022 lyngba ka saving bank account ki nongshet ja sngi, khnang ban pyntreikam noh ïa ki kyndon ka sorkar India ban siew pisa lyngba ka DBT.
Na ka liang utei u Joint Director ula kular ban ïa kren bad ki bor ba halor khamtam ka tnad puthi ban pynïaid beit noh ïa ka jingsiew ïa ka bainong ki nongshetja sngi ka PM POSHAN scheme hapoh ka West Jaiñtia Hills District.