Da ka jingpynkhuid ïew bad pynkhuid shnong, rakhe sngi kha u Mahatma Gandhi ha Jowai

Jowai, Risaw 02: Kum ka dak jong ka jingrakhe ïa ka lyngkhuh sngi kha ba 155 jong u kpa ka jait bynriew u Mahatma Gandhi, ka ophis jong u Deputy Commissioner West Jaiñtia Hills District, ha ka jingïatreilang ka Jowai Municipal Board (JMB), ka Dorbar Shnong Tymmpang Ïawmusiang Jowai bad ka Market Committee mynta ka sngi 2 tarik u Risaw kila pynlong ïa ka jingpynkhuid (Cleaning Drive) ha ki bynta jong ka Iawmusiang Jowai.
Ha shwa ban sdang ka jingpynkhuid la don ka jingïalang kaba lyngkot hajan ka ophis u Deputy Commissioner WJHD, ha kaba ïa ka jingïalang la pynïaid da u ka kong D.V. Lyngdoh Additional Deputy Commissioner, la ïoh ka jingkren na u ma Hercules Toi President ka Seiñ Raij Jowai, ma Ajoy Lywai Waheh Shnong Tympang Iawmusiang Jowai, na ki nongmihkhmat ka Market Committee Jowai, haka jingïadon lang kiwei de ki heh sorkar bad ki nongïalam shong bapher bapher.
Baroh ki nongkren kila ong ba ka jing pynkhuid ïa ka ïew ne ïa ki shnong ki thaw ym dei tang mynta ka sngi, hynrei ka dei as uwei pa kawei ban don ka jingkit khlieh ha lade shimet ka jingpynkhuid ne lehkhuid ka dei ban long man la ka sngi bad ka jingïa tylli lang ka long kaba donkam eh ha ka jingïadei bad ka jingpynneh pynsah ïa ka khuid ka suba ha ki ïew ki hat, ki shnong ki thaw bad kiwei de ki jaka.
La pynsngew ba donkam ban lehkhuid ha ki jaka ïew ne ha kino kino ki jaka kumba ngi leh khuid ha ki ïing ki sem ki jong ngi bad khamtam eh ïa ka ïew musiang kaba dei ka pliang ja jong ki nong Jaiñtia ki dei ban sumar khuid ïa ka, ym dei ban wan rah ia ki ñiut ki jakhlia na na ïing bad bret ïa ki ha ïew.
Ha kane ka sngi la ïashim bynta ban pynkhuid naduh ki ophisar sorkar, ki nongïalam shnong, ki nongshong dukan ha ïew musiang, na ka liang kiwei de ki Dorbar shnong bapher bapher hapoh ka Nongbah Jowai bad shabar ruh kumjuh kila ïashim bynta ban pynkhuid ïala ki shnong ki thaw bad ki dong ki shnat jong ki.