Shillong, Jylliew, 23: Ka Meghalaya State Olympics Association (MSOA) kan pynlong ia ka 10k Olympic Day Run ha ka sien kaba saw ha Shillong ha ka 24 tarik mynta u bnai.
Ia kane ka lympung la plie lad lang na bynta ki shynrang, ki kynthei bad kiba la heh rta, kiba la kynjoh 18 snem ka rta shaneng. Kane ka jingiakob kan sdang naduh ka por 6:00 baje mynstep na Polo Ground Shillong.
Ha kane ka kynti ba mynta ia ka Olympic Day Run 4th Edition ha Shillong la ai jingkyrshan da kiba bun ki kynrem ki lyndan ia ki nongiashim bynta ba kin ai ia kaba bha tam bad ban pynrung ia ka mynsiem jong ka Olympic ban poi sha ka thong, ka jinglong paralok bad ruh ban burom ia ka jingialehkai da ka lynti kaba khuid.
Namarba ki don palat 500 ngut ki nongiashim bynta kiba la rejistar kyrteng la khmih lynti ruh ba kan don ka jingshim bynta kaba shitrhem da kaba pyni ia ka mynsiem ialehkai.
Ha kajuh ka por kum ka dak jong ka jingburom, baroh ki nongshim bynta kin ioh ruh ia ka jingai sngewbha da ka sopti T-shirt.
U Myntri ka tnad Sports and Youth Affairs ka Sorkar Jylla u Bah Shakliar Warjri u la ong, “ngi dap da ka jingkmen ban ioh rakhe ia ka Olympic Day bad ban kyntiew ia ka mynsiem ialehkai bad ka jingkilan met lyngba kane ka 4th Edition jong ka Olympic Day Run ha Shillong. Kane ka lympung ym tang ba kan sei pyrthei ia ki riewdonsap ha kane ka jingialehkai na kane ka jylla jong ngi hynrei kan pynshlur ruh ia ki nongshnong ban don ia ka met kaba shait kaba khlaiñ.
Nga ai ka jingiaroh ia baroh ki nongshim bynta bad kitbol ruh ia baroh ki ba kin ai ia kaba bha tam ha kane ka lympung.”
Ia kane ka jingmareh thong yn kaweh lama da u Myntri ka tnat Sports and Youth Affairs u Bah Shakliar Warjri bad ka Director jong ka tnat Sports and Youth Affairs ka Kong Isawanda Laloo.
Ka lynti ba ki nongmareh kin hap ban mareh kan long kylleng ki bynta jong ka sor Shillong da kaba sdang na JN Stadium Gate No. 1, iaid pat lyngba ka Iew Polo, 4th Furlong, B.K. Bajoria Junction, B.K. Bajoria, PGT College, Shillong Commerce College, Shillong College, Don Bosco Square, Laitumkhrah Police Point, Laitumkhrah Police Beat House, Fire Brigade, St Edmund’s School, Dhankheti, Malki Point, Barik Point, Civil Hospital, State Central Library, Meghalaya Secretariat, DC Office, Governor House, Wards Lake, CM Bungalow, Polo Tower, bad iew Polo ha sha ba yn pynkut pat ha JN Stadium Gate No. 1. Ki nongjop ha kane ka Olympic Day Run kin khur ia ka khusnam da ka song pisa bad ki syrnot ia kaba yn sam hadien ba ladep ka jingmareh ka ban long ha SSA Stadium ha ka por 7:30 baje mynstep.
