Da ka jingkyrshan ki paidbah bad jingtrei shitom nga kyrmen ban jop na Nongkrem: Dasakhiat

Shillong, Jylliew 01 : Da ka jingkyrshan pura jong ki paidbah bad jingtrei shitom u myntri sorkar jongka tnad PWD (Building) uba dei u MLA jong ka Mawhati Constituency u ma Dasakhiat Lamare u pynpaw ba u don ka jingkyrmen skhem ban jop beit na ka Nongkrem Constituency.
Une u MLA jong ka Mawhati u la rai mynta ban ïakhun na ka Nongkrem Constituency kaba mihkhmat mynta da u bah Lambor Malngiang kum u MLA Independent.
“ Ngan pyrshang katba lah ban trei shitom ryngkat bad ki nongïalam bad ki paidbah ka Nongkrem ban jop ïa ka election na kane ka Constituency ba thymmai jong nga” ong u ma Dasakhiat.
U la ïathuh ba u ïoh bha ka jingkyrshan na ki paidbah bad na ka liang jongu ruh un trei shitom miet la bad sngi ban pynsngewthuh bad pynpaw haki paidbah ïaka jingthrang jongu ban ai ka jingshakri ïa ki paidbah.
U ma Dasakhiat ym tang ba un ïakhun ïa u bah Lambor hynrei pyshah ruh ïa u MLA ba rim ka Nongkrem Constituency ubah Ardent Basaiawmoit bad u bah Bindo M Lanong.
Haba la kylli hato ha kane ka kynti ym dei ka jingïakhun ka long kaba shyrkhei bha, ula ong lada kam long kaba hap ban ïakhun tyngeh ruh kam long kaba sngewtynnad ban shu jop suk. “ Namar katba dang hap ïakhun tyngeh katta dang hap ban trei shitom shuh shuh bad kan long ruh kumjuh ïakiwei ki paralok ruh namar ha kaba kut hi ki paidbah kin jied beit tang ïa uwei u nongjop”.
Tang kawei ka kabu ïa u ma Dasakhiat ka long ba ki paidbah kila mad bad tip shaphang une u MLA ba mynta bad u MLA uba rim ruh hynrei kim pat tip bad mad ïa u ma Dasakhiat namar u dang dei uba thymmai bad lehse ki paidbah kin kwah ban mad hi ïa uba thymmai ha kane ka kynti. U la ong ba ki paidbah ki sngewthuh bad tip ruh balei u rai ban iehnoh ïaka Mawhati bad ïakhun na ka Nongkresm Constituency.