Khliehriat, Jylliew 07: Kum shi bynta ka jingrakhe ïa ka Sngi ka jingkoit jingkhiah jong ka jingbam jingdih ne ka World Food safety day 2025 ha ryngkat bad ka pyrthei baroh kawei, ka Jaiñtia National Council JNC Khliehriat Circle hapoh ka jingïalam u General Secretary, u bah Symboh ba iar Sumer, mynta ka sngi ka 7 tarik jylliew, ka seng ka la shim ïa ka synjam ha kaba ka la leit khynra bad jurip ïa ki dukan bad ki hotel, kumjuh ruh ïa ki resturant kiba hap hapoh u pud u sam jong ka shnong Khliehriat ban peit sylli ïa ka rukom treikam jong ki khamtam ha kaba ïadei bad ka khuid ka suba ha ka rukom pynkhreh ne shet ïa ki jingbam jingdih na ka bynta ki paidbah kiba rung ha ki dukan jong ki.
“Ha kane ka jingleit khynra ka seng ka la lap bad shem ïa ka jingleh jakhlia bad jinglehsih ha ki katto katne tylli ki dukan bad ki hotel ha Khliehriat bad kane hi kan sa wanrah ïa ka jingeh kaba khraw ha kaba ïadei bad ka koit ka khiah jong ki nongbam kiba rung ha ki dukan, ka seng ka la buh ruh da ka jingmaham ïa ki dukan ba ki dei ban lehkhuid bha ïa ka bam, ka dih ha shwa ba kin ai sha ki paidbah ban bam khamtam ïa ki khynnah skul kiba ju rung bad mih na ka por sha ka por ha kine ki dukan ba ka seng ka la lap, ki nongïalam jong ka seng ki la ong ruh ba ka jingbam ka dei ka jingim u briew, te ha kane ka sngi rakhe jingkynmaw ïa ka sngi ka jingkoit jingkhiah ngi dei shisha ban buh hakhmat eh ïa ka khuid ka suba khnang ba kan nym wanrah ïa ki jingpang ba ba bun jait kiba lah ban ktah ïa ka jingim u briew, namar ka koit ka khiah ka dei ka spah bah ha ka jingim jong u briew”ong u kyrwoh.
Na ka liang ka JNC Khliehriat Circle ka buh ka jingkyntu ïa ka ophis jong u Food Safety officer jong ka district ban peit bad ban buddien bha ïa ki dukan ha man la ki por khnang ba kine ki dukan ruh kin nym kheiñ sting ïa ka kam ha kaba ïadei bad ka rukom shet ïa ki jingbam jingdih ba bam ki paidbah., ha kajuh ka por ka seng ka maham ba lada kine ki dukan kiba leh jakhlia kim lah ban leh ïa kaba donkam ha ka khuid ka suba khamtam ha ki jaka shet jingbam ka seng kan nym shong kli kti bad kan sa leh da kaba tyngeh ïa ki, pynkut u kyrwoh na ka seng.
