SHILLONG, Kyllalyngkot 28: Ka Shillong Cricket Association (SCA) hynne ka sngi Balang (28 tarik Kyllalyngkot) ka la ïoh ba kan sdang ïa ka lympung kriket kaba ha khlieh duh lane ka Shillong Cricket League Super Divison 2026, ha MCA Ground, Polo.
La ïoh ban plie ïa ka jingïalehkai ba nyngkong hapdeng ka Sputnik CC bad ka Nongthymmai SCC, ha kaba ka Sputnik ka la mad ïa ka jingjop da 91 ron.
Haba shimti ban tied nyngkong hadien ba jop ïa ka jingkynting pisa (toss), ka Sputnik ka la lah ban kamai haduh 330 ron bad hap noh 8 wiket haki 40 ober, ha kaba u Arien B sangma (82 ron naki 95 bol) bad u Kshitij Singhania (58 ron naki 32 bol) ki long ki nongtied kiba la noh synñiang bun ron na ka bynta ka kynhun.
Haba pyrshang beh ïa ka thong, wat hapdeng ka jingïalehkai bha u Sagar Chetri (94 ron naki 81 bol) bad u Gaurav Narleng (65 ron naki 79 bol) ka Nonthymmai SCC ka la pynkut ïa ka pali tied tang na ka bynta 239 ron namar la lap ba kut ki 45 ober.
U Nafees Siddique (9 ober: ailad 34 ron) bad u Arbin Singh (8 ober: ailad 51 ron) ki la ïoh ban khur mar 2 wiket na ka bynta ka Sputnik ban khur ïa ka jingjop da 91 ron.
Kumba ju leh ha man ki Division hadien ba la kut ka jingïalehkai, ka SCA ka la ïoh ban sam ïa ka khusnam ‘Player of The Match’ kaba la khur da u Arien B Sangma.
Ka SCA Cricket League Super Divison ka don 12 tylli ki kynhun kiba ïashim bynta bad la phiah ïa ki ha ki ar tylli ki Group (A & B). Ka Group A ka kynthup ïa ka Sputnik CC, Nongthymmai SCC, Langsning CC, Royal CC, Nongmensong CC bad ka Lumpyngad SCC; katba ka Group B ka don ïa ka Rangkynsai CC, Young Guns CC, Sputnik Spartan CC, Sporting CC, NFU bad ka Lok Bhawan CC.
