Da ka jingïaseng duwai Khristmas la pynlong ha ka ïing Dorbar Thawaiñ ba thymmai ha Mawdiangdiang

Shillong Nohprah 21: Ki Nongïalam ka jylla Meghalaya, ha ka Sngi Thohdieng ki la ïashimbynta ha ka jingrakhe lypa ban pdiang ïa ka Khristmas bad ïa u Snem Thymmai, ha ka jingïaseng duwai kaba la pynlong ha ka ïing Dorbar thawaiñ bathymmai ka jylla kaba don ha Mawdiangdiang, New Shillong Township.
U Myntri Rangbah ka jylla u Conrad K Sangma, u Lamphang u Thomas A Sangma, u Deputy Speaker u Limison D Sangma bad u Symbud Myntri Rangbah u Ma Sniawbhalang Dhar, u Myntri ka tnad bording ka jylla bah Metbah Lyngdoh, I MLA ka Laitumkhrah Dr Ampareen Lyngdoh bad kiwei kiwei kila wan ban ïashimbynta ha kane ka jingïalehkmen.
Haba kren ha ka jingïalang u Thomas A Sangma ula ong, ba ka dei ka khyllipmat jong ka jingkmen kaba khraw bad ka kabu ban rakhe ïa ka Khristmas ha ka Meghalaya Legislative Assembly bathymmai.
Ula ong, ba ka Khristmas ka dei ka por ban khmih ïalade bad ban pynthymmai kaba pynkynmaw ïa paidbah ïa ka jingieid jong u Blei bad kaba ai mynsiem ïa baroh ban pynïar ïa ka jingsbun, jingsngewthuh bad jingleh isynei ïa kiwei pat.
Ula pynpaw ïa ka jingkyrmen ba ka jingshai u Khrist kan ïarap ha kaban btin ha ki jingmut jingpyrhat, ka jingjied bad ban shakri ïa ka imlang sahlang bad ula ai khublei ïa baroh ki MLA kiba la wan ïashimbynta ha kane ka prokram.
Katba u Limison D. Sangma ula ong, ba hapoh ka jylla Meghalaya, ka Khristmas kam dei shuh tang ka jinglehkmen ha ka niam hynrei kala kylla long kum shi bynta ha ka imlang sahlang hapoh ka jylla.
Ula pynpaw ba watla ka Khristmas ka dei kaba don ïa ka jingïadei kaba la ngam jylliew bha ha ka niam, hynrei katba nang ïaid ki por kala kylla long kum ka jingrakhe ha ka pyrthei baroh kawei ban ïakmen, ieid bad ban don ka jingkyrmen, kaba ai mynsiem ïa ki briew ban ïasam lang ïa ka jingsbun, jingnoh synniang bad ka jingsngewkhia ïa kito kiba donkam.
Haba kren maitphang u Bah Andrew Simons, Commissioner and Secretary, jongka Meghalaya Legislative Assembly, ula ong, ba ka Khristmas ka long kum ka jingpynkynmaw ïa ka jingkordor ka jingieid, jingsuk bad ka jingleh isynei bad ka jingdon mynsiem para briew. Ula ong ba ka khubor jong u Trai Jisu Khrist ka ïeng kum ka dak jongka jingkyrmen ïa ki briew bad ka khot ïa baroh ban shakri da ka jingkylluid mynsiem, ban tei ïa ka jingïadei bad ka jinglong shipara ha ka imlang sahlang.
Ula bynrap ba kane ka jingrakhe ka dei ka kabu ban khmih ïa kitei ki jinglong kiba kordor bad ban pynthymmai ïa la ka jingkular na ka bynta ban pynsaphriang ïa ka jingkmen, jingsngewthuh bad jingïatylli.
U Neil Vimal Kumar u Ministry Director jongka Life Focus Society, Chennai, ula sam ïa ka khubor Khristmas bad buh jingduwai ha kane ka jingïalang.
Ha ka jingsam ïa ka khubor, u Neil Vimal Kumar ula ong ba ka Khristmas ka ïeng kum ka dak jong ka jingïadei kaba ïajan hapdeng u Blei bad ki briew ha ka lynti kaba shimet shimet, kaba pynlong ïa ki briew ban sngewthuh ïa ka jingieid u Blei lyngba ka jingdonlang ka jong u.
Hashwa kane, la pynlong ïa ka jingbuh jingduwai kyrpang, da ka jingsdang ïa ka jingpule na ka Bible da u BA Sangma, Manager jongka Assembly Press.
La ïoh ruh ia ki jingrwai kyrpang na ki khynnah jongka Children of God’s Dream Children’s Home, Lumshyiap, Langkyrding, ka Meghalaya Legislative Assembly Choir bad ka Mahila Band jongka Nagaland Police ne ka 15th NAP (IR) Mahila Band kaba dei ka kynhun tem jong ki pulit kynthei na Nagaland kaba la ïoh ïa ka jingithuh ha ka ri kaba la ïoh rung sha ka Final jongka India’s Got Talent (IGT) Season 10 ha u snem 2023 kaba la pynshohbiej ïa baroh kiba la wan sha kane ka jingïalehkmen.
Hadien kane, u Myntri Rangbah u Conrad K Sangma bad u Lamphang u Thomas A Sangma ryngkat bad ki MLA kila ïashimbynta ha ka jingot ïa u Cake Christmas, ha kaba la ïadonlang u Myntri Sorkar u Bah Metbah Lyngdoh bad ki MLA kiba kynthup ïa ka Dr M Ampareen Lyngdoh, Bah Ronnie V Lyngdoh, Bah Paul Lyngdoh, Bah Alexander Laloo Hek, ka Miani D. Shira, u Mizanur Rahman Kazi, Bah Matthew Beyondstar Kurbah, u Marthon Sangma, Bah Synshar Lyngdoh Thabah, Bah Gavin Miguel Mylliem bad u Bah Pius Marwein.