Da ka jingïarap u MDC barim, ïakhun ki nongïalam shnong ban pynïoh surok ha Mawlai Nongpdeng

Shillong, Risaw 26: Ka shnong Mawlai Nongpdeng ka la trei shitom haduh ban da ïoh thiaw ïa ka surok kaba ki la angnud bad ap khmih lynti mynta la kumba 35 snem, bad na ka bynta kane ka surok ka shnong ka la ïoh ruh ïa ka work order bad ha kine ki khyndiat sngi yn sdang noh ïa ka kam ban trei.
Ïa kane ka surok ba lait ïaid kali kaba jrong 580 meter ka dei kaban ïaid lyngba na Block A sha Block B. Ïa ka bynta jong ka Block A la dep ban trei 220 meter, katba kaba sah sa 360 meter ka dei ha Block B. Kumta ïa kane ka bynta ruh la ïoh ïa ka jingmang pisa na ka tnat PWD (Roads) kaba la kot sha ka 4.5 klur tyngka.
Kum ka dak jong ka jingkmen, ka Dorbar Shnong ha ka sngi Saitjaiñ ka la lum ïa ka jingïalang ban pyntip ïa ki nongshong shnong ha ka dong Kper Shiliang (Block B) ha kaba ki nongshong shnong bad ki nongïalam shnong ki la pynpaw ka jingkmen ba shen kin ïoh noh ïa ka surok kali ban pynsuk ïa ki ha ka pang ka shitom.
Ka shnong ha kane ka sngi ka la pyntip ruh sha ki nongshong shnong ba kane ka surok ka la urlong da ka jingbuddien bad tynruh ki nongïalam shnong na ki ophisar ka tnat khamtam eh da ka jingïarap bad ka jingshim khia u Symbud Myntri Rangbah ba khmih ïa ka tnat PWD (Roads), u Bah Prestone Tynsong.
Ha ka jingïalang u Rangbah Shnong, Bah Kitkupar Khashiing u la pyntip ruh sha ki paidbah, ba ki la leit wad jingïarap na ki nongmihkhmat ba mynta hynrei ym poi shaei shaei ruh kumta kim banse ban leit ïa kren bad kyrpad ïa u MDC barim Bah Teiborlang Pathaw uba khlem pynslem u la ïalam lynti sha u Symbud Myntri Rangbah ban leit pynsngew ïa kane ka jingdonkam.
“Mar ïa pynsngew ha u MDC barim Bah Teibor Pathaw hangto hi i ong ban buhsngi ban leit kynduh ïa i Symbud Myntri Rangbah. Ngi ruh ngi pynpaw ba ngi la long kiba kloi ban leit kynduh ha kano kano ka por namar ngi la shu paw thok khamtam haba man ka por ki nongshnong ki wan ud shangi ki nongïalam shnong ïa ka jingjynjar,” ong u Rangbah Shnong.
Shuh shuh u la ïathuh ba naduh katei ka por hi, ki nongïalam shnong da lade hi ki leit ban buddien na ki ophisar ka tnad bad haduh ban da ïoh syndon ïa ka work order ban ïoh pyntrei noh ïa ka kam.
Na ka liang ki nongïalam shnong, naduh u Rangbah Shnong, Asst. Rangbah Shnong, nongïalam seng kynthei bad seng samla bad ki rangbah dong ki la pynpaw ka jingsngewnguh ïa ka sorkar jylla kynthup naduh ki ophisar kiba la pynstet ïa ka kam, bad ai khublei kyrpang ruh ïa u Bah Teibor Pathaw bad khamtam eh ïa u Symbud Myntri Rangbah uba la la kular ban pynurlong ïa ka jingud jingnam jong ki nongïalam shnong.
Da kaba ai khublei ïa ki trai jaka, u Rangbah Shnong u la kyntu ruh ïa ki ba kin long kiba la pynkhreh ban ai ka jingïatrei lang bad ki ophisar ka tnad ynda la sdang ka kam.