Da ka jingïalehkai paralok hapdeng ka Officer-II bad ka Press-II rakhe ïa ka National Sports Day ha Ri Bhoi
Nongpoh, Nailar 29: Kum shi bynta ban rakhe ïa ka National Sports Day kumba la rakhe ha kylleng ka ri India, ka ophis u District Sport Officer ka Ri Bhoi mynta ka sngi ka la rakhe ïa kane ka sngi kyrpang da kaba pynlong ïa ka jingïalehkai phutbol paralok hapdeng ka Officers-11 pyrshah ïa ka Press-II ba la pynlong ha Madan NSCA, Mini Stadium, Pahamsyiem Nongpoh.
Ïa kane ka jingrakhe ïa ka National Sports Day la wan ban shim bynta da u samla Johny Nongrum kum uwei na u Sports Icon ka jylla kum u kongsan bad la sakhi lang ruh da ka jingdon lang u District Sports Officer ka Ri Bhoi, u Bah Bobby Nongbet, u Additional deputy Commissioner ka Ri Bhoi, u Bah M.B Tongper, u DSP head Quarter, u Bah S. Pasleiñ ryngkat bad kiwei kiwei ki ophisar sorkar.
Shuwa ba kitei ki ar kynhun kin mih ha madan ban ïa aireng na ka bynta ban ioh khur ïa ka nam jop, na ka liang u Samla Johny Nongrum kum u Sports Icon ka jylla, u la ai ïa ka jingkren ban pynpaw ka jingsngewkmen ba ka ophis u District Sports Officer ka Ri Bhoi ki la pynlong ïa kane ka sngi ban rakhe ïa kata ka sngi kyrpang ba la tip kum ka National Sports Day bad kane ka long shi bynta ban ai mynsiem ïa ki khun samla ba kin dang don kata ka mynsiem ban ieit kyrpang ïa ka jingïalehkai sport khang ban ioh ïa kata ka met kaba koit ba khiah katkum ka thong jong ka sorkar India.
U la ai khublei kyrpang ruh ïa ki ophisar sorkar bad kumjuh ruh ïa ka kynhun ki nongthoh Khubor na Ri Bhoi kiba la kloi ban shimm bynta na ka bynta ban ïalehkai paralok bad kane ka jingshim bynta jong kine ki ar kynhun ka long ruh ka jingai mynsiem ïa ki khun samla ba kin dang don kata ka mynsiem ban phai sha ki kam ïalehkai sport ha ka District bad ka jylla hi baroh kawei.
Lyngba jong kane ka sngi, la pule ruh ïa ka jingsmai (Fit India plede) kaba long shi bynta ban ïa snoh kti lang bad ka thong jong ka sorkar India ban pynlong ïa ki nongshong shnong kiba koit ba khiah da kaba ki shim bynta ha ki kam ïalehkai sports bapher bapher.
Haba phai pat sha ka jingïakhun kitei ki ar kynhun, ka Officers-II pyrshah ïa ka Press-II, ka Officers-II ka la ioh khur ïa ka nam jop da kaba ka la pynrem ïa ka Press-II da 3-1 kol.
La pynkut ruh ïa kane ka jingrakhe ïa ka National Sports Day da kaba sam ïa ki khusnam Torphy sha kitei ki ar kynhun ba la pynkhreh da ka ophis u District Sport Officer ka Ri Bhoi.