Da ka jingïalehkai kynjatbol pynkut ka J/S Presbyterian Phlangwanbroi ïa ka ka jingrakhe dap 125 snem

Phlangwanbroi, ‘Naiwieng 22: Ka Balang Presbyterian Phlangwanbroi lyngba ka Jingïaseng Samla Balang Presbyterian Phlangwanbroi kaba hapoh jong ka Mawsynram C&RD Block, East Khasi Hills District ka la ïoh ban pynkut noh ïa ka jingrakhe lehkmen ïa ka Quasquicentennial Jubilee Celebration ne ka jingdap 125 snem jong ka Balang da kaba ki la pynlong ïa ka lympung ïalehkai kynjatbol ka Knock Out Football Tournament 2022 ha madan Phlangwanbroi.
Katkum ka jingïathuh ba kiba la poi ha ka phainal jong katei ka lympung ïalehkai ki long ka Jingïaseng Samla Balang Presbyterian Lawbah bad Jingïaseng samla Balang Mawkhan ha kaba ka Jingiaseng Samla Balang Lawbah ka la lah ban pynliem noh da 5 – 1 kol ïa ka Jingïaseng Samla Balang Mawkhan bad rah syndon ïa ka nam lahduh.
Ka jingpynlong jong ka J/S Balang Presbyterian Phlangwanbroi ïa kane ka lympung ïalehkai kynjatbol ka long kum ka dak ban pynsah kynmaw ïa ka jingrakhe jong ka Balang ïa kane ka jingrakhe ba kyrpang ha ka jingdap 125 snem ha kaba ïa ka lympung ïalehkai la plie naduh ka 6 tarik u ‘Nailar, 2022 bad la pynkut pat ha ka 19 u Naiwieng, 2022 kaba dei ka sngi saitjaiñ. Ha kane ka sngi ban pynkut u bah H.M. Shangpliang u nongmihkhmat jong ka dong ka thaiñ u la long kum u kongsan bad shim ruh ka bynta ban wan pynhap pyrda noh ïa kane ka lympung ïalehkai bad kumjuh ka jingrakhe ïa ka jingdap 125 snem jong ka Balang Presbyterian Phlangwanbroi.
Haba phai ha kaba ïa dei bad ka jingwan ïashimbynta jong ki kynhun sha kane ka Knock Out Football Tournament 2022 ki don baroh 30 tylli ki Jingïaseng Samla Balang kata kiba napoh ka Shella Presbytery bad na kiwei pat ki Presbytery kiba Marjan.
Ha ka sngi ban pynkut ïa ka jingïalehkai la ïa don lang naduh ki Rangbah na Phlangwanbroi u R. Sohmat, na Kenbak Malai u bah S.K. Dewkhaid bad na Mawsawa u Lamper Iawrod bad kumjuh ruh ki Tymmen Basan, ki Pastor, ki Rangbah Balang.