Nongstoiñ, Nailar, 09: Naduh ba ka sorkar Assam bad Meghalaya ki la ïasoi ïa ka soskular pynbeit pud haduh mynta ki paitbah jong ki shnong ki ba la shah pynhap sha Assam ryngkat bad ki sengbhalang jong ka West Khasi Hills kim hun satia bad ki dang ïai pyneh hi triang ba kin ym mynjur da lei lei ïa katei ka soskular.Kumta kum ka dak ban pynpaw ïa ka jingïai pyrshah ïa katei ka soskular ba la ïasoi hapdeng ki ar sorkar ha khmat u Myntri kam pohïng ka ri u Amitshah ki nongïalam ka Hynñiewtrep Youth Council West Khasi Hills hadien ba ki la ïashong pyrkhat sani bha halor katei ka kam kum ka dak jong ka jingpyrshah kin pynlong ïa ka jingïalang paitbah ha Nongstoiñ la shi sngi kata ka 11 tarik sngi palei.
U samla Reddy Fernandy Sun u nongïalam ka HYC West Khasi Hills haba ïakren bad ki nongthohkhubor mynta ka sngi u la ong, hashuwa ban sdang ïa ka jingïalang kin pynlong ïa ka jingïaid proseshon ka ban sdang na pyrshah State Bank of India (SBI) Nongstoiñ Branch kaba don ha Spengthawlangmlah ha ka por 12 baje mynsngi haduh ban da poi ha New Nongstoiñ Market Complex bad kin pynlong ïa ka jingïalang paitbah ha katei ka jaka.
Une u nongïalam ka seng u la kyntu ïa baroh nongïalam shnong, ki paitbah nongshong shnong kiba wan ïew wan hat ki nongshong dukan bad ki paitbah kiba sngewkhia ïa katei ka kam ba kin ïasnohkti lang ha katei ka jingïaid proseshon.
