Nongpoh, Nailur 30: Hadien ba la lap ba bun ki bar jylla ha ka thaiñ Raid Marwet kim shym la don ïa ka Trading License ban leh ïa ki kam khaïi bapher bapher hapoh katei ka thaiñ, u Syiem ka Raid Marwet u la khot lum syndon da ka jingïalang sha baroh ki bar jylla ban pynshai halor ki kyndon ba ki hap ban bud haba ki wan seng ïa ki kam khaïi bapher bapher hapoh ka Raid Marwet.
Kane ka jinglum u Syiem ka Raid Marwet ïa ki bar jylla kiba ym don ïa ki kot ki sla haba ki seng kam seng jam ban khaïi, ka dei hadien ka jingwan jurip u EM ba dei peit ïa ka Trade na ka KHADC ha ka sngi Thohdieng sha ka thaiñ Killing ba la lap bun ki bar jylla kim don satia wat ïa ka Trading License ban pynïaid ïa ki kam khaïi pateng ba ki hap shuwa ban ioh bor na ka KHADC.
Ïa kane ka jingïakynduh lang ki bar jylla la pynlong ha ophis u Syiem ka Raid Marwet ha kaba da ki phew ngut ki bar jylla bym don kot don sla ne bym don trading license ki la wan ban shim bynta bad ruh ba ki la kohnguh ban bud ïa ki kyndon ba la buh da ka KHADC hadien ba la pynshai halor ki kyndon ba ki hap ban bud shuwa ba kin seng ïa kino kino ki kam khaïi.
Ha kane ka jingïakynduh lang la don lang ruh u EM ba dei peit ïa ka Trade na ka KHADC, u Bah Gigur Myrthong, u MDC ka Nongstoin, u Bah Gabriel Wahlang bad kynthup ruh u Syiem ka Raid Marwet kiba la ïa kren bniah bha ban tehlakam halor ka jingwan seng kam seng jam beaiñ ki bar jylla khlem da ioh jingbit na ka KHADC khamtam ka Trading License bad wat ki labor License.
U EM ka Trade na ka KHADC, u Bah Gigur Myrthong, u la ai jingkren bad pynshai halor ki kyndon ba ki bar jylla ki hap ban bud ryntih haba ki wan seng kam seng jam bad u la ong ruh kumba la kam ba ka don ka jingslem ban ioh ïa ka trading licesne ka lah ban dei na ka jingbym biang ki kot ki sla ba ki hap ban pynbiang sha ka Council.
Shuh shuh, u la ong ruh nangne shakhmat ka Council kan shim khia ban ïa kren kyrpang halor ka jingai trading license sha ki bar jylla ha ki shnong khappud bad kan da bishar bniah ruh ïano dei ban ai bad lada ai ruh kan long kum kawei na ka lad jingïada ïa ka khyndew ka shyiap ha kaba lyngba ka jingdon ki dukan ki bar jylla kan long kum u mawpud ban ïada ïa ka khyndew ka shyiap jong ka jylla Meghalaya.
