Jowai, Jylliew 22: Ka Khynroo Khyllood Committee, Seiñraij Jowai ha ryngkat ka jingïatreilang bad ka Dorbar Ñiam ha kane ka 21 tarik sngi saitjaiñ, kila pynlong ka jingïa kynduhlang hapdeng ki khun samla ha Madan Kñia Pyrthat, Dulong Poh-hali.U ma Raymond Nartiang, Pator Raij Jowai kum u shnong knor ha kane ka sngi ula pdiang sngewbha ïa baroh kiba wan sha kane ka Dorbar, la ïoh ruh ka Nguhblai Nguhsyiem da u Samboon Siangbood, Langdoh Raij Jowai. Katba napdeng ki khun samla kiba ai jingkren ki kynthup u Sienmiki Lato, Seiñraij Jwai, halor ka phang “Ki khynroo Khyllood ha ka Tipkur Tipkha”, u Kunemiki Passah, Seiñraij Ummulong halor “Ki khynroo khyllood ha i maia ñiam” bad u Sanhiwot Kyndiah, Seiñraij Shillong halor “ki khynroo khyllood ha ka Sngi Kylliang ka Nongkylliang”.
Ha kane ka sngi ki khun samla kila ïoh lad ban pynpaw pyrthei ïa ki sap ki phong jong ki lyngba ka jingïakop ‘Tied Bom’ na ka bynta ki shynrang, ïa ki kynthei la pynlong da ka jingïakop ban pyndep ïa ka “Ka Siang Ka Pha” kaba long ka rukom lehñiam ba kyrpang jong ki khun ka Ñiamtrai haman la ki ïing ki sem haka por Behdieñkhlam.
Lyngba kane ka jingïakop Tied Bom bad “Ka Siang Ka Pha” kala long ka Dorbar kaba shongshit, ha kaba kitei ki khun samla kila ïoh ban pynpaw ïa ka jingnang jong ki.
Hashwa ban poi sha kaba kut jong kane ka Dorbar u ma Womlin Pakyntieñ, Kñi ka Kur Pakyntieñ, ula ai ka jingkyntu kynpham ïa ki samla synrang bad kynthei halor ka phang “ I tip niam Tip rukom ki khynroo khyllood wa man i ku ka Niamtre”. Ha kane ka jingïakop ‘Tied Bom’ la wan ban ïashim bynta da ki khun ka dong Panaliar, Loomkyrwiang, Dulong, Loomiongkjam, Tpep-pale bad Loompyrdi Iongpiah. Katba ha ‘Ka Siang Ka Pha’ ki long ka Panaliar, Loomkyrwiang, Loompyrdi Iongpiah, Dulong bad Loomiongkjam.
