Jowai, Jymmang 02: Shi bynta na ka jingrakhe ïa ka jingdap 75 snem ka jingïoh laidluid ka Ri na ka liang ka ophis u Deputy Commissioner ka West Jaiñtia Hills District ha ryngkat ka ophis u District Sports Officer (DSO) hynnin ka sngi 30 tarik kila pynlong ïa ka North East Festival, 2022 ka jingïakop mareh ba la tip kum ka ‘Marathoh-Cross Country Run’.
Ha kane ka jingïakop la pynbynta ha ki ar kyrdan kata haka liang ki shynrang bad ki kynthei (open Category), la sdang ïa ka jingmareh haka por 6 baje mynstep na Kiang Nangbah Stadium sha Ladthadlaboh mainroad-Lad College- jingkieng Myntdu-Stand War-Mynthong-Chutwakhu-Mission Compound-Iongpiah-Dulong Tpep-Pale-Iawmusiang-Newhill-National Highway bad pynkut biang ha Kiang Nangbah Indoor Stadium.
La kaweh ïa ka lama da u Superintendent of Police ka WJH u Bikram D. Marak, ha ryngkat ka jingdonlang u SDO ma K. Passah, ka kong D.D Syngai (ADC), u W. Kharlukhi (EAC) ki nongkitkam ka WJDSA lem bad ki nongïashim bynta.
Ka jingïamareh ha ka kyrdan jong ki shynrang (Men Category) la jop da u Dasaman Kyndait ba wan ba ar da u Belin Dkhar bad ba lai u Damang i Lyngdoh, ha ka liang ki kynthei jop ka ka Phyrnai Kyndait bud sa ka Happiness Phawa bad ka Nangkiewsuki Slong.
Katba u Ram Ryngkhlem (58) snem ula long u nongjop na ki nongïashim bynta ba heh duh ha ka rta bad u Mihsalan Shylla ba rit duh 10 snem kiba la ïoh mar 100 tyngka.
Ha kane ka juh ka sngi la sam ïa ki khusnam sha ki nongjop kaba long 5000 tyngka ba nyngkong, 3000 tyngka kiba wan ba ar bad 2000 tyngka kiba wan ba lai, baroh kiba la wan ban ïa shim bynta ha kane ka jingïakop mareh ki don haduh 145 ngut.
