Da ka jingïakob yn pynlong ka KS&SWC ha ka 30 tarik Ïaïong ha Kharang

Shillong, Ïaïong 11: Kum shi bynta ban pynkhie im biang ïa ka jingïalehkai kaba pawnam bha ha ki snem 1990 shapoh, na ka liang ka Khasi Hills Chapter ka la pynkhreh mynta ban pynlong da ka ïakob ñiah ball bearing ha ka 30 tarik mynta u bnai ha Kharang, East Khasi Hills.
Ïa kane ka jingïalehkai yn pynlong da ka Kharang Sports & Social Welfare Club, kaba dei kawei na ki club kaba la rim tam hapoh ka jylla Meghalaya kum shi bynta ka jingrakhe ïa ka jingdap 50 snem ka jingïoh la ka jong ka jylla ba pura bad kumjuh ruh ïa ka jingdap 50 snem ka jingïaid lynti jong ka club.
“Ngi rakhe ïa ka jingdap 50 snem ka jingïoh la ka jong ka jylla ba pura bad kumjuh ruh ka jingdap 50 snem jong ka club da kaba ngi pynlong ïa kiba bun ki lympung ïalehkai mynta u snem ha kaba ka jingïakop ñiah ball bearing kadei kawei kaba hakhmat eh ha kane ka jingrakhe dap 50 snem,” ong u Bah Banjop Mukhim uba dei u nongai buit jong ka club haba kren sha ki lad pathai khubor ha Shillong Press Club ha ka sngi Nyngkong.
Nalor ka ïakop ñiah ball bearing, ka club kan pynlong ruh ka jingïakob ñiah cycle lyngba ka jingïarap jong ka Meghalaya Cycling Association.
U Bah Banjop u la ong ruh ba ka club ka khot bad ïawer ïa kiwei pat la ka long na ki ophis treikam, kiba treikam la jong (business) ba kin phah ïala ki jong ki kynhun ban ïashim bynta ha katei ka lympung, da kaba pynpaw ruh ba kane kadei ka lad ïa kito kiba don sap ba kin pynpaw pyrthei.
Haba pynbna ïa katei ka jingïalehkai na ka liang u President jong ka club u Bah Khrawkupar Warjri u la ong ba ha ka ïakob ñiah ball bearing yn shah tang na bynta kiba 18 haduh 40 snem hynrei kiba 18 snem shapoh kin hap ban wanrah ruh ka shithi bala mynjur da ki kmie ki kpa. U la pyntip ruh ba ha katei ka jingïalehkai yn shah ban pyndonkam tang da ki ball bearing kiba shna da ki dieng tylli, ka tyre kam dei ban duna ka jingrben ïa ka 2 inshi bad 1 phut ka jingheh.
“Ki nongïashim bynta kin hap ban rah la ki jong ki tiar bad ban pynrung kyrteng ïalade ha ka 29 tarik Ïaïong ha ryngkat ka bai rung kaba 500 tyngka bad ba kin ïoh ïa ki pla thep jingdonkam bad ki number ïalehkai,” la ong u Bah Khrawkupar.
U Bah Banshanlang uba dei u vice president jong ka Meghalaya Cycling Association u la ong ba ka MTB – XCO kaba dei ka jingïakop ñiah cycle kadei kawei na ki jingïakop ñiah cycle kaba biang tam ba ka club kan pynlong.
U Bah Khyllait, u la ong ba kane ka jingïalehkai kadei kawei na ki lad ka kabu na bynta ki nongïalehkai donsap jong ka jylla ba kin pynpaw pyrthei ïala ka jong ka sap hakhmat kiwei pat ki nongïalehkai jong kiwei pat ki jylla kiban sa wan ban ïashim bynta lang ha katei ka lympung.
U Bah Khyllait, uba la mihkhmat ïala ka jong ka jylla ha kiba bun ki jingïakob ñiah cycle la ka long hapoh ka jylla bad shabar ka jylla ruh u la ong, “Nga thikna ba kane kan dei kawei na ki lympung ïalehkai XCO kaba biang tam hapoh ka ri India,” u la ong.
Ïa ka jingpynrung kyrteng lah ban ïoh na ka dukan die bicycle kaba don hajan ka skul St Edmund’s.
Ha katei ka jingïalehkai kaba la pdiang sngewbha ïa baroh lait noh tang na bynta kiba 18 snem shapoh kiba hap ban wanrah ryngkat ka shithi jingmynjur na ki kmie ki kpa, la pynkhreh da ka song pisa kaba 50 hajar tyngka na ka bynta ki nongjop kynthup kiba nyngkong, ba ar, ba lai bad kiwei kiwei. Katba na bynta ki kynthei kim donkam ban siew bai rung.