Shillong, Nailar 03 : Ka jingïalehkai jong ka leg ba ar (second leg) jong ka lympung OC Blue Shillong Premier League (SPL) 2021-22 kaba la long ha ka sngi Balang ha madan MFA Third Ground, Polo ka la sdang da ka jingïakhaid.
Ki ar tylli ki team kiba la mih madan ha katei ka sngi ki long hapdeng ka Shillong Lajong FC pyrshah ïa ka Rangdajied FC ha kaba kitei ki ar tylli ki team ki la ïasam mar shi point hadien ba ki la ïakhaid khlem da don ba ïoh thep kol.
Ka Rangdajied FC ha ka jingïalehkaI kaba la long ha ka 8 tarik Naitung ka la pynliem ïa ka Shilllong Lajong FC da 2-0.
Hashwa ban mih madan, ka Rangdajied ka don ha ka kyrdan ba lai da kaba kamai 13 point katba ka Shillong Lajong ha ka kyrdan ba hynriew da 7 point. Lyngba katei ka jingïakhaid, kitei ki ar tylli ki team ki dang neh ha kajuh ka kyrdan ha ka miej kheiñ point.
Ha katei ka jingïalehkai, ka Rangdajied ka la mih madan khlem ki player ba hakhmat kum u Chesterpaul Lyngdoh bad u Samuel Shadap, kiba khlem don lang bad ka kynhun bad u Donboklang Lyngdoh, uba shah pynshong ben. Ka Rangdajied ka la thep phra kol ïa ki san tylli ki team kiba kham khlaiñ bad u Donboklang marwei u la thep mar shiteng na kitei ki kol, kumta ka jingbym don lang jong u ha ka kynhun ka la pynlong ïa kiwei ki player ban ïakhun triang ban thep kol. Hynrei bun tylli ki kabu ki la pynlehnoh ei.
Katba ka Shillong Lajong ka la pyrshang pynkylla ïa ka rukom ïalehkai da kaba pynïalehkai ïa u Everbrightson Mylliempdah shakhmat hynrei utei u rangïalehkai u khlem lah ban pynurlong ban pyntam ïa ki saw kol mynta ka samoi.
Ha kawei ka liang, kane kadei ka sien kaba ar ba ka SLFC ka khlem shah thep kol ha kaba ka la ïakhaid ruh arsien khlem da ïathep kol.
Ha ka jingïalehkai, u K Lalfakzuala u la ïoh ban sangah da ka khlieh kaba la wan lyngba ka free-kick na u Sangti Janai Shianglong. Sa shisien u Shianglong u la ïoh biang ban rah ïa ka bol shakhmat hynrei u khlem ïoh ban pynrung ïa ka bol ha kaba u rangap kol ka Rangdajied u Banshanlang Sten u la ïoh ban kem suk.
Na nynta ka RUFC, u Knerktilang Buam u la khyrwit tyngeh na sha jngai ha ka minit ba 15 jong ka jingïalehkai shwa ba ka bol ba la shut da u Raikutshisha Buam la ïoh ban kyrda noh Wanteilang Malngiang.
Ka Rangdajied ka la ïoh ka kabu kaba khatduh lyngba u Donboklang uba la mih madan kum u rangïalehkai shongbeh ha ka minit ba 89 jong ka jingïalehkai hynrei ka bol ba u la khyrwit ka la lait salit ban rung shapoh kol. Kumta haduh kaba kut jong ka jingïalehkai kitei ki ar tylli ki team ki khlem lah ban pynrung kol ha kaba ki la hap ban hun da kaba ïasam mar shi point.
Ka jingïalehkai mynta ka sngi Palei kan long hapdeng ka Mawlai SC kaba don ha ka kyrdan ba nyngkong da kaba kamai 19 point pyrshah ïa ka Nangkiew Irat SC kaba do ha ka kyrdan ba san da 9 point ha ka por 4 baje janmiet.
