Nongpoh, Nohprah 23: Ha shwa ba ka pyrthei kan pdiang ïa ka miet ba kyrpang jong ka jingwan long briew u khun u Blei, lane ka Christmas, ka Assumption Catholic Church Nongpoh Area mynta ka sngi ka ka la pynlong ïa ka jingïaid Carol ban pynphriang ïaka khubor jong ka Khristmas ba la sdang naduh phyllaw ka Nongpoh Parish, ter ter shilynter ka surokbah, bad la pynkut pat ha phyllaw jong ka Parish.
Ïa katei ka jingïaid Carol ïashim bynta shitrhem da ki riewngeit ka Balang Katholik, kiba la ïa riam ha ka dur u Santa Claus lem bad kiwei kiwei ki riam ba iphuh iphing bha bad la lamkhmat da ki kali kiba tem ïa ki sur jingrwai Christmas, kaba la pynsngew kmen ïa ki paidbah harud surok ryngkat ka jingïashad jingïakmen, ka jingkynhoi risa jong ki heprit, ki khun samla bad ki riew rangbah, kiba la pynphriang ïa ka khubor kaba bha halor ka jingwan long briew u Khun u Blei, ha ryngkat ka jingai khublei Christmas ïa ki paidbah ba ïa ieng harud surok.
Ha shwa ban sdang ïa katei ka jingïaid Carol, la ïoh ïa ka jingkren halor ka jingmut jong ka jingïaid Carol na i Sister Melita Syiem, Superior, St. Mary’s Nongkhrah. La ïoh ruh ïa ka jingpharia ïa ka khubor Christmas na u Fr. Johny Epen, Assistant Parish Priest jong ka Nongpoh Parish, ha ka jingdonlang u Babu Kril Nongrum, Head Catechist, u Bah Elius Warjri, Chairman ka Assumption Catholic Church Nongpoh Area, bad u Samla Lumlang Shylla, Secretary.
Ïa kane ka jingïaid Carol la pynkut noh da ka jingïa ot cake bad ka jingïalehkmen lyngba ki prokram bapher bapher, kaba la pynlong ïa kane ka sngi kum ka sngi kaba dap da ka jingkmen, ka jingieid bad ka jingsuk kaba dei ka jingmut jong ka Christmas.
