Da ka jaka sum ba paka ïarap u Rangbah sha ka jaka ri khusnwet ka Ri Bhoi Synod ha Mawsyntai

Nongpoh, Naiwieng 05: Kum uwei na u riew rangbah na Ri Bhoi District bad uba shong basah haka shnong Saiden uba ju trei ïa ki kam paidbah ha kane ka Dsistrict, u Bah M.G Kharshanlor mynta sngi da ka mynsiem jong ka jingkmen rygnkat ka ïing ka sem ki la leit ban aiti noh ïa ka jaka sum kaba la trei sngewbha da u ma u sha kawei na ka jaka ri khunswet ba pynïaid daka Ri-Bhoi Presbyterian Synod Children’s Home (Girls) kaba don ha ka Shnong Mawsyntai ha Ri Bhoi District.
Ha kane ka sngi kaba kmen ba u Bah M.G Kharshanlor u la plie bad aiti ïa katei ka jaka sum ha katei ka jaka ri khunswet la don lang ka kurim bad 2 ngut ki khun bad kynthup ruh ki Pastor ka Ri Bhoi Synod ba kynthup naduh u Rev HL Marsing President SELDA, u Rev. RK Marsing Moderator Ri-Bhoi Presbyterian Synod, u Rev DS Roy Muktieh, u Rev. BB Markhap, ka kong Darisha Mallai Superintendent katei ka jaka ri khunswet bad kiwei kiwei de.
Lyngba jong kane ka sngi, ka Ri Bhoi Synod ka la ioh lad ruh ban plie paidbah ïa ka ophis treikam katei ka jaka ri khunswet ba ki nongtrei ki la ioh ïa kata ka lad ban pyntyllun ïa ki kam ki jam ha ki kam shakri.
Haba ai jingkren ha kane ka sngi, u Bah M.G Kharshanlor um lah khlem da jaw ki ummat haba kynmaw ïa la u kpa uba la khlad noh. Ua la ong ruh ba u Blei u la kyrkhu kyrdoh ïa u ba u la kynjoh sha ka jingïaid lynti ba 50 snem jong ka jingim, kaba u dang dap 50 snem ka rta ha ka 20 tarik u Ïaiong 2025 bad ha kane ka jingrakhe ïaka jingdap 50 snem ka jingïaid lynti ka jingim, u la leit rakhe kyrpang ruh ha katei ka jaka ri khunswet ryngkat ki khunswet. U la ong ruh ba dei ha kane ka jingrakhe ïaka sngi kha jong u, ba u la p ba katei ka jaka ri khunswet kam don wat ka jaka sum ba paka na bynta kitei ki khundwet bad kane ka la ktik ïa ka mynsiem jong u, kaba u la shong pyrkhat bad la ka kurim ban rai ban pynshna ïa katei jaka sum ha katei ka jaka ri khunswet.
U la ong ruh ba u dap da ka mynsiem jong ka jingsngewkmen ha kaba wat lada ka jingpynshna ïa kane ka jaka sum ha katei ka jaka ri khunswet ka la shim por kumba katto katne por, hynrei u ainguh ïa u Blei ba u la lah ban pndep pura bad la lah ruh ban aiti syndon ïa kane ka jaka sum ki khunswet sha ki bor pynïaid katei ka jaka ri khunswet.
“U Blei u la kyrkhu ruh ïa ka jingim jong u bad ïa ki kam ki jam jong u ha ka jingïaid lynti jong ka jingim bad u kyrmen skhem ba u Blei un pdiang ïa kitei ki jingai sngewbha jong u sha ka jaka ri khunswet ka ban sa long ruh ka sngi sah jingkynmaw ha kane ka jaka ri khunswet kaba dang donkam shibun ki jingirap ban pynbit pynbiang na kito ki riew kylluid mynsiem” ong u Bah M.G Kharshanlor.
Ha kane ka sngi, ka liang ka Ri Bhoi Synnod lyngba ki Pastor ki la pynpaw ïa kata ka mynsiem jong ka jingkmen halor ka jingkylluid mynsiem une u rangbah uba dei ruh u khun jong ka Balang, uba la shim ïa kane ka kam kaba khraw ban synñiang lem ïa ki jingdonkam kane ka jaka ri khunswet, ba la ri ïa kita ki khynnah kiba ym don kmie ym don kpa bad na ka liang ka Ri Bhoi Synod kan buh ïa kata ka jingduwai kaba kyrpang ba u Blei un dang kyrkhu ïa ki kam ki kti jong u, ba un dang lah shuh shuh ban leh shibun ki kam kiba khraw kiba long na ka bynta ka burom jong u Blei.