Nongpoh, Jylliew 12: Kum shibynta ban noh synniang bad kyntiew ïaka imlang ka sahlang, ha shnong ha thaw ka Synrop Multi-Purpose Co-operative Society Ltd kaba dei ruh ka seng kaba dang thaw dang shen kala shim ïaka sienjam ba nyngkong haka sngi Saitjaiñ ban trei naka bynta ka bha ka miat ka imlang ka sahlang da kaba pynshna da kawei ka jaka saitjaiñ ba paka naka bynta ki paidbah nongshong shnong jong ka Nongjri Umsohlang.
Kane kala pynkmen ïa ki paidbah nongshong shnong khamtam ki khun samla kynthei bad ki longkmie kiba hap ban ïa sum ïa sait hakawei ka shyngiar umdih kaba don ha katei ka shnong.
Ïa katei ka jingpyntrei ïa katei ka jaka saitjaiñ la ïalam ruh da u Bah Rangkynsai Lapang Chairman jong ka Society haka jingdonlang jong ki dkhot kiba la ïa shimbynta ban trei hi bad ban shna ïa katei ka jaka saitjaiñ haka jingdonlang ruh u Rangbah Shnong ka Nongjri Umsohlang u Bah Tynrai Khraw Malieh.
Haba pynpaw ïaka jingsngew burom ïaka Society naka liang u Bah T Malieh Rangbah shnong u la ai ka jingkyrkhu kyrdoh bad kitbok kitrwiang ïa katei ka society ba kan dang kiew shaphrang haki liang baroh bad kan dang lah ban trei shitrhem ban leh ki kam ba bha haka imlang ka sahlang naka bynta ka jingmyntoi jong ki paidbah bad ai ruh ka jingkhublei ba kyrpang halor ka jingpynshna ïa katei ka jaka saitjaiñ ban pynsuk ïaki paidbah ha katei ka shnong.
Naka liang u Bah R Lapang kum u Chairman katei ka kynhun u la pynpaw ka jingsngewkmen ba ka kynhun haka sien ba nyngkong eh kala lah ban leh ki kam ba bha naka bynta ka shnong, kaba long ruh ka jingmyntoi bad ka jingkyrkhu ïaki paidbah nongshong shnong bad kum ka kynhun ka dang don ruh shibun kiwei pat ki kam ba kan dang leh nangne shakhmat naka bynta ban nohsynniang sha ka imlang ka sahlang, u la bynrap.
