Da ka jaka sah ba 4.50 klur tyngka ïoh ka GWS ban sah ki kynthei Garo ba wan trei ha Shillong

Shillong, Nohprah 10 : U Myntri ka tnad Arts and Culture ka sorkar jylla, Bah Sanbor Shullai ha ka sngi Saitjaiñ u la plie paidbah ïa ka Working Women’s Hostel, jong ka Garo Welfare Society kaba don ha Rilbong, Shillong ïa kaba la tei ha ka jinglut kaba kot sha ka 4.50 klur tyngka.
Ïa kane ka Women’s Hostel la plie ha ryngkat ka jingdonlang u Bah IW Ingty, Secretary jong ka tnad Social Welfare ka sorkar jylla nalor kiwei kiwei ki ophisar ka tnad Social Welfare bad ki Rangbah Shnong na katei ka thaiñ.
Na ka Liang u Kongsan, Bah Sanbor Shullai haba kren ha kane ka sngi u la ai khublei ïa ki ophisar ka tnad Revenue khamtam ïa u Prof RC Laloo uba dei u Myntri barim ka tnad Revenue bad ruh ïa u Myntri ba rim ka tnad Social Welfare kiba la ai ka jingkyrshan ban pynurlong ïa kane ka Hostel kynthup ïa ki Nongïalam Shnong na ka thaiñ.
“Dei ha ka por jong ki ba ngi la soi ïa ka soskular kynthup ïa ki ophisar kiba la trei ryngkat ryngkat ha kito ki por,” u la ong.
U la ïathuh ruh ba ha ki por mynshwa katei ka jaka ka kylla long kum kawei na ki ktem kam sniew, ban leh kam bymman, dih drok bad kiwei kiwei ha shwa ban ïeng katei ka hostel.
“Naduh ka por ba nga dang long MDC nga ju ai jingmut ban phah jingtyrwa sha ka sorkar ban leh eiei hynrei ym don ba leh,” u la ong.
Shuh shuh u la ïathuh ba mar ïa jop kum u MLA ka thain, u la trei jar jar bad phah jingtyrwa sha ka sorkar. “Haba ka file ka poi sha u Myntri Revenue, Dr. RC Laloo hangtei hi u ai ka jingmynjur bad kumta ngi la soi ïa ka soskular. Bad ïa kane la mang ban tei ha ka jinglut 4.50 klur tyngka na ka bynta kane ka hostel,” u la ong.
U Bah IW Ingty ha ka jingkren u la ong ba kane ka Hostel kan ai ka jaka sah kaba shngain bad kaba bit dor na ka bynta ki kynthei na Rilum Garo ba wan trei wan ktah ha nongbah Shillong.
Na ka liang u Rangbah Shnong, Bah G Lyngdoh ha ka jingkren u la ong baroh baroh ki kynhun bad ki seng ki kwah ban ïoh ïa katei ka jaka ba dei jong ka sorkar. Hynrei u ong ba dei lyngba ka jingtrei shitom jong u Bah Sanbor ba la pyn ïoh ïa katei ka jaka na bynta ka Garo Welfare Society kaban peit ïa ka bit ka biang jong ki paid Garo ba sah bad ba trei ha nongbah Shillong.