Nongpoh, Nailur 25: Kum shi bynta ban rakhe ïa ka jingïaid lynti kaba la dap la 8 snem kynthih ba ka kynhun ka la ai ïa ka jingshakri na ka bynta ban kyntiew ïa ka ioh ka kot bad ka roi ka par ki paidbah ha ka thaiñ Umgyrnga, kawei ka kynhun ba la tip kum ka MOSONiE Socio-Economic Foundation ka la lah ban plie noh ïa kawei ka jaka ai jinghikai ba la tip kum ka ‘Resource Centre’ halor ka jingthmu ban ai jinghikai sha ki paidbah ha ki bynta bapher bapher ban kyntiew ïa ka ioh ka kot bad ka bha ka miat jong ki paidbah nongshong shnong ka thaiñ Umtyrnga.
Ïa kane ka Resource Centre katei ka kynhun la wan ban plie da u Extra Assistant Commissioner ka Ri Bhoi bad uba dei ruh u Block Development Officer ka Umling C&RD Block, u Bah Eric Kevin Dkhar kum u kongsan bad la sakhi lang ruh da ka jingdon lang u Rangbah shnong, u Bah Bur Khongtyngkut, ki riew rangbah bad ki paidbah nongshong shnong ka thaiñ Umtyrnga.
Kane ka kynhun MOSONiE Socio-Economic Foundation haba plie ïa kane ka Resource Centre ka oong ruh shi bynta ka jingrakhe ïa ka jingdap 8 snem ka jingïaid lynti ba kane ka kynhun ka la shakri na ka bynta ka bha ka miat bad ban kyntiew ïa ka ioh ka kot jong ki paidbah nong shong shnong katei ka thaiñ Umtyrnga.
Kumba la pynpaw da katei ka kynhun, kane ka jingrakhe ïa kane ka sngi ba dap 8 snem ka kynhun kam dei satia tang ba la plie paidbah ïa katei ka jaka ai jinghikai bad shi bynta ruh ka long ban pynpaw paidbah halor ki kam ba la trei da kane ka kynyhun kaba la leh shibun ki kam babha ban kyntiew ïa ka bha ka miat, ka roi ka par bad ka ioh ka kot jong ki paidbah nongshong shnong ha katei ka thaiñ.
Ha kane ka sngi, na ka liang u Block Development Officer ka Ri Bhoi, u Eric Kevin Dkhar haba kren ha katei ka sngi u la ai ka jingkhublei kaba kyrpang ïa katei ka kynhun MOSONiE Socio-Economic Foundation kaba la ïaid lynti la 8 snem kynthih ban ai ka jingshakri sha ki paidbah bad ha kajuh ka por u la kyntu ruh ïa kane ka kynhun ba kan dang bteng ka jingshakri kumno ban saindur na ka bynta ka bha ka miat, ka roi ka par bad ka ioh ka kot jong ki paidbah kumba ka la shakri bad shim ruh sa ïa ka sienjam ban plie ïa kane ka shlem ai jinghikai sha ki paidbah ka thaiñ.
