Shillong, Jylliew 20 : U Chief Executive Member (CEM) jong ka Khasi Hills Autonomous District Council (KHADC), Bah Titos W Chyne ha ka sngi Nyngkong u la pyntip ba un phah da ka ‘Internal Inquiry’ haba ïadei bad ka jingbym pat phah ïa ki jingkheiñ jingdiah da ka Council sha ka ophis jong u Comptroller and Auditor General (CAG) of India.
“Ngin sa shong ïa ka Executive Committee la shai ka sngi Ba-ar, bad ngan sa tyrwa ban don da ka Internal Inquiry halor kane ka bynta,” ong u CEM haba kren bad ki lad pathai khubor. U CEM u la pyntip ruh ba katei ka kynhun tohkit kan bishar bniah bin pa bin ïa ki jingkheiñ jingdiah jong ka KHADC khnang ba kan ym don ka jingbakla ha ka por ba audit.
“Ngi kwah ba baroh kan long kaba khuid bad kaba shai,” la bynrap biang u CEM.
Ha kane ka sngi u CEM u la ïathuh ruh ba ka KHADC ka la dep ruh ban jubab sha ka CAG ha ka 22tarik u Ïaiong mynta u snem hadien ba ki la ïoh ïa ka shithi na katei ka ophis.
Ha kajuh ka por, u la ïai ban pat ba ka sien kaba khatduh ba ka Council ka ïoh biang ïa ka audit report na ka CAG kadei naduh u snem 2012.
“Ngi la rah ïa kane ha ka Dorbar Mangtyngka kaba dang shu dep shen, kaba mut ba ka jingbishar ïa ka jingkhein jingdiah jong ka Council kadei haduh u 2013. Kane ka mut ruh ba naduh u snem 2013 ki dang ïai audit hi na ka snem sha ka snem,” u la ong da kaba bynrap ba don ruh ki account ki bym pat pynbiang.
U CEM u la ong ruh, “Ha kine ki ar snem ba la dep na ka daw u Covid ngi khlem lah ban pynïaid ïa ka audit, kumta haba don ka khlam ym lah ban ïa shong ne treikam ka la thut ka kam. Hynrei ban ong ba kan don kano kano ka jingpyndonkam bakla ïa ka pisa, kata kam don, ka shu long ba ym pat lah ban audit lut ïa ka jingkhein jingdiah naduh u snem 2013 haduh kane ka snem treikam kaba mynta.”
