Da ka Industrial Visit pynkut ka E-Cell, JEC Khliehriat ïa ka prokram ai jinghikai Assistant Electrician

Khliehriat Rymphang 8: Ka tnat treikam jong ka Jaiñtia Eastern College Khliehriat, ka E-Cell, JEC ha ryngkat ka jingïatreilang bad PRIME Meghalaya, MBMA, ka la pynlong ïa ka prokram ai jinghikai kaba 30 sngi bad ïa kane ka prokram ai jinghikai la pynkut noh myn ha ka 3 tarik mynta u bnai rymphang 2026.
Ka jing ai jinghikai ka dei halor ka Assistant Electrician bad Entrepreneurship ha ka Electrical Wiring bad ha ka sngi ba pynkut ka E-cell ka la pynlong ïa ka jingleit jngoh ïa ki karkhana lane ka Industrial Visit da kaba pynlong ïaia ka prokram ha company Green Valliey Industries Limited, Nongsning East Jaiñtia Hills District ha kaba la sam ruh ïa ki syrnot sha baroh kito kiba la pyndep ïa ka jingshah hikai.
Ïa ka Industrial visit la pynlong hapoh ka jingïalam u M. V. Rao, uba dei u GM (Process), Green Valliey Industries Limited, uba la ai jingkren ruh halor ki kam kiba ïadei bad ka bor ding electrict ba ju pyntreikam ha ka karkhana ha kajuh ka por u la ong ruh ba ka long kaba donkam ban shim ïa ki lad jingiada, ki jingïatehkyndon (safety standards) bad ki kam kiba dei hok ha ka jaka treikam da kaba ai jinghikai ïa ki khynnah kiba leit shah hikai shabar ha kaba kin tip ïa ka kam wat ha ki classroom jong ki.
Ïa ka prokram la pynïaid da u Profesor Banpynskhembha Papang, uba dei ruh u SPOC, E-Cell, kum u shongknor ba pyniaid ïa ka prokram u la pynshai ïa ka jingthmu bad ka jingangnud jong ka jinghikai bad ong ruh ba ïa kane ka jing ai jinghikai la thaw khnang na ka bynta ka jingbit jingbiang ki khynnah samla pule da kaba pyndonkam da ki kor ki bor jong ka juk mynta kaba lah ban iarap ïa ki samla ha ka iohkam iohjam bad kane ka shlem ai jinghikai ka ai jingtip ruh halor ki lad kiba iadei bad ka seng kam seng jam lane kata ka entrepreneurship, shuh shuh u la ong ba kane ka shlem ai jinghikai ka dei ruh ka jingiohi jngai jong ki bor pyniaid college ban kyntiew ïa ki khun samla.
Kawei na ki bynta ba kongsan eh jong kane ka jinghikai ka long ba ki khynnah kiba la pyndep ïa ka jingshah hikai ki la ioh ruh ïa ka lad ban leh ïa ka kam wiring ïa ki lai tylli ki kamra klas ha Jaiñtia Eastern College bad la leh ïa kane ha ka jingdon ryngkat lang ki nonghikai kiba ai jinghikai ïa ki.
Shuh shuh ki samla kiba la pyndep ïa ka jingshah hikai hapoh ka jingïalam ki nonghikai kiba la ai jinghikai ïa ki ha ki sngi ba ki dang shah hikai, ki la hiar sa sha shnong Lama East Jaiñtia Hills District ha kaba ki la leh ïa ka kam electrical wiring ha ka ïing community hall ha shong Lama bad dei hangne ba ki samla pule ki la ioh ïa ka lad ban pyniasoh lang ïa ka pule puthi lem bad ki kam technical ha kaba ki lah ruh ban long ka jingkyrkhu ïa ka im lang ka sah lang bad ruh ban thaw ïa ki lad kamai.
Na ka liang u Principal jong ka Jaiñtia Eastern College, u Dr. P. Nongtdu, u la pynsngew bad ong ba ïa kane ka jinghikai la pyniaid katkum kaNational Education Policy (NEP) 2020, kaba don ka jingthmu ban kyntiew ïa ka jingpule puthi kaba long ruh katkum ki sap ki phong bad ki jingsngewtynnad jong ki samla pule.
U Dr P.Nongtdu u la pynsngew ruh ba ki la don haduh sanphew ngut ki samla pule kiba la pynrung kyrteng ïalade ha kane ka prokram bad 24 ngut ki samla pule ki la lah ban pyndep ïa ka jingshah hikai kata hadien ba ki pass ïa ka eksamin viva ha ryngkat bad ka praktikal bad ki samla ba la pyndep ïa kane ka jingshah hikai mynta ki la dep thep kyrteng ban aplai ïa ki license ban long kita ki certified electricians bad kane baroh ka pyni shynna ïa ka jingjop bad ka jingpoi thong ka college ha kaba kyntiew ïa ki samla pule.Shuh shuh u Dr P.Nongtdu u la pynpaw ka jingsngewnguh bad ai ka jingïaroh kaba khraw ïa ka PRIME Meghalaya na ka bynta ka jingïarap bad ka jinglong la kloi ba ai ka jingïatreilang bad ka college ha kaba ka college ka la ioh ban pynlong ïa kane ka prokram ai jinghikai kaba jop bad kaba poi thong.
Ha kane ka sngi ba pynkut ïa ka prokram la ia don ryngkat lang ruh u Vice President, Green Valliey Industries Limited Nongsning, u Pawan Joshi, uba la shah khot sngewbha kum u Special Guest bad haba kren ha ka jingialang u Pawan Joshi u la kyntu ïa baroh kito kiba shah hikai ba ki dei ban nang ïai bteng ban trei bha ïa ka kam kaba ki la ioh jinghikai tat haduh ba kin da lah ban pynlong janai ïa ka kam bad ong ruh ba ka jingtreishitom bad jingiaineh ki dei ki bynta kiba kongsan bha ban poi sha ka thong ha ka jingim.
Ïa ka prokram la pynkut da ka jingsam ïa ki syrnot sha baroh kiba la lah pyndep ïa ka jingshah hikai kaba pynpaw ïa ka jingpyndep kaba pura jong ki nonghshah hikai bad kane ka prokram ka pyni ruh ïa ka mynsiem aiti lut jong ka Jaiñtia Eastern College Khliehriat ha kaba pyn khlaiñ ïa ka jingiatreilang hapdeng ki karkhana bad ki shlem ai jinghikai kiba ai jinghikai ym tang ha ka thoh ka tar hynrei ha ki kam ki jam ruh ban kyntiew ïa ki samla bad ban pynroi ïa ka kam kum ka entrepreneurship, ka dei kawei ruh ka bynta kaba don ka jingiasnoh lang bad ka imlang ka sahlang ha ki kam ba ki samla ki trei.