Shillong, Jylliew 08: Ka Samkhamti shen kan sa pynlong ïa ka lympung ïalehkai football ba la tip kum ka Independence Cup 2022 kaba mar khyndai ngut shiliang. Ïa kane ka lympung yn pynlong ha u Naitung bad pynkut ha ka 15 tarik Nailar.
Haba pynbna ïa kane ha ka sngi Balang u Bah Samkhamti Diengdoh uba dei u nongpynïaid u la ïathuh ba ka jingthmu ban pynlong ïa kane ka lympung ka long tang na bynta ka Pynthorumkhrah Constituency ban kyntiew ïa ki samla ïalehkai football bad khnang ba kin lah ban pynkhreh janai khamtam kito ki samla kiban sa ïalehkai ha ka Fourth Division, Third Division bad Second Division ba pynïaid da ka Shillong Sports Association (SSA).
U la ïathuh ba ïa kane ka lympung kaban pynlong ha madan Urkaliar nyngkong yn pynialehkai da ka play-off na bynta 64 tylli ki team bad kiba rem kin duh rung katba ki 32 tylli ki team kin ïakhun ban rung sha ka round of 16. Nangta kan don ka quarter final, semifinal bad khatduh ka final kaban sa pynlong ha ka 15 tarik Nailar 2022. Ha kane ka lympung la bthah ruh ba man kawei ka team kidei ban pynrung lai ngut ki nongïalehkai Under-18.
