Nongpoh, Nohprah 15: Kum kawei naki shnong kaba dang sahdien kaba dang donkam shibun ki kam pynroi ka shnong Mawphrow ha Ri-Bhoi District mynta ka sngi kala iohpdiang syndon da ka iing Dorbar kaba paka ryngkat ka shlem treikam jong ka Iasnohktilang Village Organisation kaba don ha katei ka shnong.
Ïa katei ka iing Dorbar la tei lyngba ka skhim SRWP katba ïa katei ka shlem treikam jong ka VO la synrop lang da ka skhim SRWP bad kumjuh ruh ka skhim MNREGA ba kum ka shnong bad ka VO kan lah ban pyntyllun ïaki kam ki jam jong ka shnong lem bad ki longkmie ha katei ka shnong kum ka jingai sngewbha Khristmas da u MLA ka Nongpoh u Bah Mayral Born Syiem u ba la leit ban plie paidbah ïaki mynta ka sngi.
Ha kane ka sngi ka jingplie paidbah ïa ka iing dorbar bad kumjuh ruh ka shlem treikam jong ka VO la sakhi ruh da ka jingdonlang u Raja Brahma Project Director ka DRDA, u Rangbah Shnong Mawphrow u Bah Anthony Maring, Kong Helina Makri President VO, u Bah Agustine Makri Rangbah Balang Katholik Mawphrow, B.Tron Rangbah Balang Presbyterian Mawphrow Rev. SS Nongrum Pastor Balang Presbyterian Mawphrow lem bad ki nongtrei na Umling C&RD Block.
Haba kren ha kane ka sngi kum u kongsan u Bah Mayral Born Syiem u la ong ba kine ki ar tylli ki kam pynroi kiba la plie paidbah mynta ka sngi ki dei kiba kongsan haduh katta katta, namar naduh ki por ba mynshuwa ka shnong Mawphrow kadei kawei naki shnong kaba dang sahdien hynrei ki don pat ki briew kiba trei shitom kiba iohijngai ïaka jingdonkam ki kam pynroi ha katei ka shnong ha kaba ka long pat ka jingkmen ba mynta ka sngi la ioh ban plie paidbah syndon ïaka iing Dorbar bad kumjuh ruh ïaka iing treikam jong ka VO.
Ha katei ka juh ka sngi naka liang u Bah Mayral Born Syiem u la aiti ruh daka Work Order sha ka kynhun Ïa-snoh-ktilang Village Organisation naka bynta ban tei ïaka paiñkhna jong ka karkhana saiñ sohtrun.
