Da ka ïing skul ba bun mala ïoh ka Village Durbar HS Swer na ka ADB

Shillong, Nailur 27 : U Chief Executive Member ka KHADC ba dei ruh u MDC ka Sohra ha ka sngi Ba-ar u la plie paidbah ïa ka iing skul jong ka Village Durbar Higher Secondary School, Swer kaba la tei lyngba ka jingbei tyngka da ka Asian Development Bank.
Ïa katei ka iingskul kaba la tei ha ka jinglut kaba 2 klur tyngka, u Bah Titos u la plie ha ryngkat ka jingdonlang ka District School Education Officer ka East Khasi Hills, Kong M Lyngwa nangta u Principal Babu Dmai S Mawñiuh, ki dkhot ka Managing Committee, ki nongïalam shnong, ki doktor na Swer PHC bad ruh ki kmie ki kpa jong ki khynnah skul.
U CEM haba kren kum u Kongsan u la ong, “Nga kmen haba nga ïohi ba kane ka iingskul ka la dep.” U la pynpaw ruh ba um pat hun tang ba la dep ka iing skul kaba u pynïoh ha ka por ba u dang long kum u MLA hynrei u thrang ruh ban ïohi ba ha kawei ka sngi, katei ka skul nalor ka Arts kan ïoh ruh ban don wat ïa ka Science Stream ruh.
Namar ka don ka jingkyrpad u Principal ba ki dang donkam ka jingkyrshan ban pyndep pat sa ïa ka jingtei kaba sah shajrong, u CEM u la kular ban ai 15 lak na ka skim khnang ba ki samla pule kin ïoh ban pyndonkam pura ïa ki kamra klas. U la ai ruh ka burom ïa ki nongïalam shnong kiba shim ïa ka lyngkor ban tynrong ïa ka jingkit bakhia jongka skul bad pynlong ruh wat da ka fete na ka bynta ban pyndap pynbiang ïa ki jingduna kiba bun.
Ha kajuh ka por, u la pyntip ruh ba ka jingwan jong ka DSEO ha katei ka sngi kam dei tang na ka bynta ka prokram hynrei ruh ban wan jurip ïa ka jinglong jingman jong ka skul.
U Bah Titos u la kyntu ruh ïa ki khynnah skul, ba ki khynnah shynrang kim dei satia ban leh kyrkieh ka dih biri sikret tangba la poi klas 10, klas 11 ne 12 kumjuh ruh ïa ki samla kynthei ban kyrkieh thoh shithi ne lapmiet tang ha ka mobile.
“Kynmaw haba phi don ka thong ban long doktor ne engineer minot thop haduh ban da urlong ym ban shu pynper ha suin ïa ki jingangnud jong phi,” u la ong.
Ka DSEO pat ka la pynpaw ïa ka jingkmen ban ïohi ba katei ka skul ka la kiew stet bha. Ka la ïaroh ruh ïa ka jinglong ryntih (discipline) ha ka rukom pynkhreh bad pynbeit ïa katei ka prokram ba ki pynlong ha katei ka sngi.
“Ka long kaba sngewtynnad ban ïohsngew ba yn ai jinghikai computer ei ïa ki khynnah nalor ka jingdon ki smart class,” ka la ong.
Nalorkata, ka pyntip ruh ba ka skul Village Durbar kadei kawei na ki 30 tam tylli ki skul ha ka distrik kiba ïoh ïa katei ka iingskul ba kyrshan da ka ADB.
Shwa kane, na ka liang u Principal kumjuh na u Secretary Shnong ki la ïathuh shaphang ka jingïaid lynti jong ka skul kumno ki ïoh kyntiew kyrdan suki pa suki naduh klas 6 ter ter shaduh ka klas 12 mynta hapdeng ki rai-eh rai-dam ha kine ki 30 snem tam.
La pynphuh ïa katei ka sngi da ki jingshad jingrwai bad ruh ki prokram ba harukom na ki khynnah skul.