Nongpoh, Nohprah 13: Ka long ka jingkmen bad ka jingkyrkhu kaba khraw ïaki longkmie jong ka jingïaseng kynthei jong ka Balang Presbyterian Mawphru ha kaba u MLA ka Nongpoh, U Bah Mayral Born Syiem, mynta ka sngi u la leit ban plie paidbah ïaka iing jong ka jingïaseng Kynthei jong ka Balang Presbyterian Mawphru Mathan bala tei lyngba ka skhim SRWP.
La sakhi ruh ha katei ka sngi da ka jingdonlang u Bah Balajied Ranee MDC ka Nongpoh, Tbn. KRW Mangu, Bah D Mangu Rangbah Shnong, Kong E Mangu Chairperson ka Jingïaseng Kynthei, ki nongïalam bad nongsharai Balang lem bad ki paidbah nongshong shnong.
Ha katei ka juh ka sngi naka liang u MDC u la ïoh ruh ban plie paidbah ïaka paiñkhana jong ka Balang ba kum ki paidbah kin ïoh ban pyndonkam ïaka haka por long jingïaseng.
Haba kren ha katei ka sngi naka liang ka kong E Mangu Chairperson kala pynpaw ba kum ka jingïaseng Kynthei ka dap da ka jingsngewkmen kaba khraw hadien ba u MLA ka Nongpoh u la shimkhia ban pynïoh ïaka iing jong ka jingïaseng kynthei kaba paka ba kum ki longkmie kin danglah ban pyntyllun ïaki kam ki jam jong ka Balang.
U Bah Mayral Born Syiem kum u kongsan haba kren ha katei ka sngi u la pynpaw ka jingsngewkmen ban ïohi ba katei ka iing ka ieng ha katei ka shnong wat hapdeng ki jingduna kiba bun ban pynbiang ïaka jingïarap hynrei kum ki longkmie kila lah ban pynurlong ïa katei ka jingangnud jong ki haduh bala ïoh ban plie paidbah syndon ïaka mynta ka sngi.
U la ong ruh ba kum ki nongmihkhmat ki sngewkmen ban ïohi lada ki ki paidbah ne ki shnong ki pyndonkam hok ïaka skhim bala ai haki bad kane kan long ka jingmyntoi kaba khraw ïaki longkmie ha katei ka shnong ban dang pyntyllun ïaki kam jong ka balang.
Naka liang u MLA u la kyntu ruh ïaki paidbah ha katei ka shnong ba kin dang ai ka jingïatreilang ban dang wanrah shuh shuh ki kam pynroi ha katei ka shnong naka bynta ka bit ka biang jong ki paidbah nongshong shnong.
