Da ka ïing bathymmai aiti ka JHDS bad KHUBLEI Germany ïa ka longïing baduk ha Mihmyntdu

Jowai, Rymphang 08: Ka Jaiñtia Hills Development Society (JHDS) ryngkat bad ka jingkyrshan ka KHUBLEI Germany sa shisien pat ki la ïoh ban plie sa kawei ka ïing bathymmai ha ka Shnong Mihmyntdu West Jaiñtia Hills District.
Ïa kane ka ïing la plie da ka kong Belinda Phawa kaba dei ka Trai-ïing bad la kyrkhu kyrdoh da u Fr. Augustine Lamin u Parish priest ka Cathedral Parish Jowai ha kane ka 7 tarik u Rymphang 2026.
Ka kong Belinda Phawa kadei ka Nongshong Shnong jong ka Shnong Mihmyntdu kaba hap hapoh West Jaiñtia Hills District, ka don 5 ngut ki khun 3 ngut ki shynrang bad 2 ngut ki kynthei, u wei na ki u dei uba don jingduna ha ki dkhot met.U lok jong ka u ma Damonmi Chyrmang udei u ba don jingpang stroke bad u la shu thiah pang mynta la kumba 13 snem eiei. Baroh shi katta kane ka longïing kam shym la don ka ïing ba paka hynrei ki shu sah ha ïing barim jong ka mei-ieid jong ki.
Dei ha u bnai Risaw 2025 ba ka Jaiñtia Hills Development Society ka la ïohi ïa ka jingeh ba kane ka longïing ka ïa kynduh. Kumta da ka jingkyrshan ka seng KHUBLEI Germany ka JHDS ka la sdang ban kner ka jingïarap sha kane ka longïing ba shem jynjar.
Ïa ka jinglut jingsep haba tei ïa kane ka ïing la ïarap bei tyngka da ka Seng KHUBLEI Germany ryngkat ka jingïatreilang bad Jaiñtia Hills Development Society (JHDS) kaba dei ka shnat treikam imlang sahlang jong ka Jylla Niam Jowai.
Shuwa ban aiti ïa kane ka ïing, la don ka jingïalang ba lyngkot ïa kaba la pynïaid da u Rangbah Balang Ricallus Pasi, ryngkat ka jingïadonlang u Fr. Manbha Pakem, Director ka JHDS, u Bah Denis Kurkalang, Coordinator ka JHDS, bad ki Nongïalam Balang ka Balang Katholik Mihmyntdu.
Ha kaba kut ka prokram, Ka Kong Belinda Phawa ka la ai khublei ïa ki nongïarap, kyrpang eh ïa ka JHDS bad ka KHUBLEI Germany kiba la shim ïa kane ka sienjam ban pynïoh ïa ki kane ka ïing ba thymmai.