Nongpoh, Rymphang 28: Kawei ka longïing ba duk ha shnong Kalapangti, kaba hap hapoh ka Umroi Constituency, ka la dap da ka jingkmen kaba khraw hadien ba u MLA ka thaiñ, u Bah Damanbait Lamare, u la leit ban plie bad aiti ïa ka iing kaba u la pynshna sngewbha na ka bynta jong ki.
Kane ka iing ka dei jong u Bah E. Mukhim bad ka Kong N. Lyngdoh, kiba don haduh 10 ngut ki khun. U MLA u la pynshna ïa ka iing kaba don hynriew tylli ki kamra, bad nalor kata la pynbiang ruh ïa ka paiñkhana bad ka bording, khnang ba katei ka longiing kan im suki m kmen kumba long lem kiwei.
Ha ka sngi plie ïa katei ka iing, la sakhi lang da u Bah S. Pakyntein, Officer In charge ka Khapmara PIC, u Bah T. Rynjah, Rangbah Shnong Kalapangti, u Bah Pynskhemlang Sun, President NPP Raid Madan Kyrdem, lem bad kiwei pat ki riew rangbah ka thaiñ.
Haba kren ha kane ka sngi naka liang u Bah Damanbait Lamare u la pynpaw ka jingsngewkmen kaba khraw hadien ba katei ka longiing kan pdiang ïa katei ka iing da ka jingkmen ha kaba kum u nongmihkhmat u la ong ba ka dei ka kamram jong u ban kit ban bah ban peit ïaka eh ka shon ki longiing baduk haka constituency namar ka jingshakri paidbah ka dei hi ban bha ban miat bad ban kiew shaphrang ka imlang ka sahlang.
U la pynpaw ruh ba ka iing ka sem jong naduh u kpa jong u, u Bah Ngaitlang Dhar u dei u briew u ba ju ïarap ïaki longiing ba duk ba rangli kumta u kwah ba kane ka rukom ïarap kan neh ban kyrshan ïaki longiing ba duk bad kiba donkam ka jingïarap.
