Shillong, K’ Lyngkot 14: Ka ophis District Magistrate, Eastern West Khasi Hills District, Mairang hapoh ka Section 163 BNSS, 2023 ka la pynmih ïa ka hukum ban khang ïa ka jingshalan bad kit, ka jingpynlang ne die ne ban sam ïa ki dohkha kiba la wanrah shalan beaiñ na shabar kum na Bangladesh khlem ki kot ki sla kiba treikam katkum ka aiñ, ka jingpyndonkam ïa kano kano ka kali, ki jingkit da ki lieng ne ka jingïarap ban pynkit ne ban pynsuk ïa ki riew shimet ne ki kynhun kiba donkti ha kum kine ki kam kiba beaiñ.
Kane ka hukum la pynmih hadien ka jingïoh jingtip ba la ïohpdiang ba la don ka jingkit ïa ki phet wir bad ryngkat lang bad ki dohkha kiba wan na Bangladesh kiba la jia na kiba bun ki khappud, ki wah, ki surok bad ki ïew kiba hapoh ka jylla, bad kum kine ki tiar ki lah ban rung ha ka district lyngba kiba bun ki lad ki lynti bad kiba lah ban long ka jingma ïa ka jingshngaiñ jong ka ri, ka bha ka miat ki paidbah, ka koit ka khia ki paidbah, bad ka bha ka miat ka ïoh ka kot, kumta donkam ki lad jingïada kiba long mardor.
Kino kino kiba pynkheiñ kin shah pynshitom hapoh ki kyndon ka aiñ bad katkum ka Section 223 BNSS Act, 2023 bad kiwei ki kyndon ka aiñ ba kynthup ïa ka BNS, Custom Act, Foreign Act, Passport Act bad kiwei kiwei.
