Shillong, Nohprah 04: Ki bor pynïaid district jong ka East Khasi Hills ha ka sngi Palei ki la pynmih ïa ka hukum ba pynjari da ka kyndon 163 BNSS, ha kaba kane ka kyndon ka mana tyngeh ban thang ïa ki khlaw kiba hab hapoh ka jingpeit bad pynïaid jong ka district.
Ka jingpynmih ïa kane ka hukum kadei ban tehlakam ba kan ym don ka jingpur ding ha ki khlaw ki btap bad ban ïada ïa ka mariang, nangta ïa ka jingshngaiñ ki paidbah bad ïa ka jingim jong ki briew.
Katkum ka hukum kaba la pynmih da ka district magistrate ka Kong RM Kurbah ka la pynpaw ba kila don ki jingpyrshang khnang bad ka la jur ruh ka jingthang khnang ïa ki khlaw kaba la lam sha ka jingpur ding ha ki khlaw bad lam sha ka jingpynjulor ïa ka mariang bad ki jingjulor jong ki jingdon jingem kiba lah ban ktah ha kano kano ka por.
Ha ka hukum la ong ba kane ka jingkhang pyrshah kan treikam noh mardor bad kan bteng ban treikam tad haduh ban da pynbna da kumwei pat.
Kino kino kiba pynkheiñ kin shah pynshitom hapoh jong ka kyndon 223 jong ka BNSS. Kane ka jingmana kadei shi bynta ban ïaleh ban ïada ïa ki jingdon jingem ha ka thaiñ bad ban ïada na kino kino ki jingjulor.
La kyntu ruh ïa ki paitbah ba kin ai ka jingïatreilang bad ki bor district kila maham ba kino kino kiba pynkheiñ kin shah pynshitom da kaba tyngeh ha kane ka aiñ.
