Nongpoh, Jylliew 21: Ka ophis u District Sports Officer Ri-Bhoi District kala pyntip bay n sdang biang ïaka prokram ai jinghikai ïaki heprit kynthei bad shynrang kaba la tip kum ka Grassroot Football Training naduh kiba 6-12 snem ka rta ban sa pynlong haki jaka bapher bapher ha Ri-Bhoi District.
Katei ka prokram ai jinghikai kan sdang naduh u bnai Naitung ha man la sngi Thohdieng bad sngi Saitjaiñ naduh ka por 3 baje haduh 5 baje janmiet haka sngi Thohdieng bad 8 baje haduh 10 baje mynstep haka sngi Saitjaiñ.
Ki jaka ban ai jinghikai kin long ha Nongpoh, Umsning, Umroi, Jirang, Bhoirymbong, Mawhati bad Umroi Advance Center, kumta ki khynnah kiba kwah ban leit shah hikai sha katei ka prokram ai jinghikai haka football kin leit ban shim ïa ki form na ophis u DSO lane haki center bapher bapher haki jaka jong ki ryngkat ki kot ki sla kum ka Birth Certificate, Medical Fitness Certificate naki Doctor sorkar ryngkat bad 2 tylli ki dur passport.
